د ۲۰۲۵ کال د توليدي چارو نړيوال کنفرانس د سپتمبر په ۲۰مه نېټه د ان هوی ولايت په مرکز هه فې ښار کې پرانيستل شوی دی. د چين د ولسي سياسي مشورتي کنفرانس د ملي کمېټې مرستيال وانګ يونګ د دغه نړيوال کنفرانس په پرانيستونکو مراسمو کې ګډون او وينا وکړه.
ښاغلي وانګ يونګ د خپلې وينا په ترڅ کې ويلي، د چين د دولت رئيس شي جين پينګ د توليدي چارو پرمختګ ته خورا زيات ارزښت ورکوي او د ۲۰۱۹ کال د توليدي چارو نړيوال کنفرانس ته يې يو پيغام استولی دی. له تېرو شپږو کلونو راهيسې چين د دولت رئيس شي جين پينګ تر لارښوونې لاندې له مختلفو خواوو سره د ګډو ګټو پر بنا د ياد نړيوال کنفرانس رول لوبولی، خپلمنځي واقعي همکارۍ يې ژورې کړې او د نړيوالو توليدي چارو پرمختګ ته يې قوي ملاتير برابر کړی دی.
هغه دا هم وويل، چين به د نوي پړاو علمي او تخنيکي انقلاب او صنعتي اصلاحاتو پر وړاندې د رئيس شي جين پينګ څلور نړيوال وړانديز جدي پلی کړي، د توليدي چارو په شمول کليدي ساحو کې له مختلفو خواوو سره خپلمنځي همکارۍ پياوړې کړي، د ټکنالوژۍ، بااستعدادو کسانو او ډيتاګانو د تګ راتګ خنډونه به ليرې کړي، توليدي، علمي او څېړنيزې چارې به سره اتصال کړي، کليدي او مرکزي ټکنالوژيو ته به پرمختګ ورکړي څو له علمي لاسته راوړنو څخه ګټې پورته کړي، د ټيټ کاربن ايستنې او زرغون پرمختګ ومومي او باکيفيته پرمختګ او ښه اينده تر سره کړي.
د نړۍ له څه باندې ۴۰ هېوادونو او سيمو څخه راغلو کابو زر تنه مېلمنو د ۲۰۲۵ کال د توليدي چارو په نړيوال کنفرانس کې ګډون کړی دی.
