زیلینسکي: د اوکراین استازو له حضور پرته به د سولې خبرې بې ګټې وي

د اوکراین ولسمشر ولادیمیر زیلینسکي په خپلو تازه څرګندونو کې ویلي، چې نړیوال متحدین یې باید له روسیې سره د سولې د مذاکراتو لپاره یو چوکاټ جوړ کړي او کیف باید په دغو مذاکراتو کې بریالی رول ولري. زیلینسکي دغه راز زیاته کړې چې د اوکراین د استازو له حضور پرته به د سولې خبرې اترې بې ګټې وي. د اوکراین ولسمشر وروسته له هغې دا څرګندونې کړې چې متحده ایالاتو د جمعې په ورځ، جنوري ۲۴ له اسرائيل او مصر پرته خپلې ټولې بهرنۍ مرستې وځنډولې. ډونالډ ټرمپ د خپل انتخاباتي کمپاین پر مهال او د ۲۰۲۴ کال د نومبر پنځمې انتخاباتو وروسته په وار وار ویلي چې د روسیې او اوکراین ترمنځ جنګ په چټکۍ سره پای ته رسولی شي. خو تر اوسه یې په دې اړه جزئيات نه دي ورکړي. ټرمپ تمه لري چې په کراره او چټکه توګه په اوکراین کې جنګ پای ته ورسوي. ښايي په دې اقدام کې کیف د یو داسې توافق منلو ته اړ کړای شي چې د مسکو په ګټه وي.