حکومتي سرچينې وايي چې د افغانستان د سولې په اړه د مسکو په غونډه کې به د سولې عالي شورا پلاوى ګډون وکړي.
د روسيې د حکومت په نوښت دغه غونډه ټاکل شوې وه چې د روان لمريز کال د وږي په ١٣مه جوړه شوې واى، خو د افغان حکومت د کلک مخالفت له امله ځنډېدلې وه.
څو ورځې مخکې د روسيې د بهرنيو چارو وزارت اعلان وکړ چې له افغان حکومت سره تر مشورې وروسته اوس دا غونډه د لړم په ١٨مه په مسکو کې جوړېږي.
د بهرنیو چارو وزارت ويلي چې د مسکو د غونډې د څرنګوالي په اړه خبرې دوام لري او لا په دې اړه وروستۍ پرېکړه نه ده شوې.
د بهرنيو چارو وزارت وياند صبغت احمدي وايي، که د دولت له چوکاټه بهر څوک د مسکو په غونډه کې ګډون کوي، نو دوی يې مخه نه نيسي.
احمدي زياته کړې: «زموږ مذاکرات روان دي او پر یوې پایلې کار کوو، خو په ځانګړې توګه د غونډې د څرنګوالي په اړه هوکړې ته نه یو رسېدلي او بحث دوام لري.»
بلخوا يوې باوري حکومتي سرچينې پژواک ته ويلي چې د مسکو په غونډه کې يوازې د سولې عالي شورا يو پلاوى ګډون کوي.
سرچينې زياته کړې، ولسمشر سپارښتنه کړې چې د سولې عالي شورا مشر کريم خليلي، د دارالانشاء رييس اکرم خپلواک، مرستيالان هر يو اقچون، حبيبه سرابي، حاجي دين محمد او د مولوي عطاء الرحمن سليم په ګډون بايد يو پلاوى ګډون وکړي.
سرچينه وايي چې خليلي له هېواده بهر دى او اکرم خپلواک په ياده غونډه کې له ګډون څخه ډډه کړې ده، نو قوي امکان شته چې د سولې شورا پاتې غړي ګډون وکړي.
د بهرنيو چارو وزارت وياند تر دې وړاندې ويلي وو چې د افغان حکومت له ګډون او مالکیت پرته به د غونډې جوړېدل اغېزناک نه وي.
هغه د مسکو په غونډه کې د ځینو افغان سیاستوالو ګډون ته په اشارې سره ویلي چې افغان حکومت د سیاستوالو د ګډون او نه ګډون په تړاو مسوولیت نه لري، هغوی پېژندل شوې څېرې دي او له همدې امله بلنه ورکړل شوې ده.
