د سولې په تړاو چې څومره پرمختګ کېږي، ورسره خلک خوشالېږي او هیلې زیاتېږي. په دې منځ کې ځینې بدلونونه او دریځونه داسې وي چې خلک یې اندېښمن کړي هم وي. یوه چاره چې لا هم له خلکو سره په دې تړاو اندېښنې شته، هغه دا ده چې طالبان له افغان حکومت سره خبرې نه کوي، بلکې له امریکا سره پر خبرو ټینګار کوي.
طالبان بیا بیا وايي چې له افغان حکومت سره خبرې نه کوو. لومړی خو اړتیا ده چې پر دې دریځ له سره غور وشي، خو که طالبان بیا هم پر خپل دریځ ولاړ وي، نو پکار ده چې له نورو افغانانو سره خبرې وکړي. که څه هم طالبان وايي چې له سیاسي ګوندونو، اشخاصو او خلکو سره خبرې کوي او په دې کې کومه ستونزه نشته، خو لا هم په عملي ډول دا چاره نه ده پیل شوې.
طالبان وايي چې لومړۍ او بنسټیزې خبرې یې له امریکایانو سره دي. دوی اوس همدا کار کوي او له خلیلزاد او نورو امریکايي استازو سره یې اوږدې خبرې کړې دي. خو په دغو خبرو کې د افغاني لوري نشتون، د دې لامل شوی چې اندېښنې زیاتې شي. اوس طالبانو ته پکار ده چې د دغو اندېښنو د ختمولو لپاره له افغان سیاستوالو، سیاسي ګوندونو او متنفذو خلکو سره لیده کاته او خبرې پیل کړي. که څه هم طالبان وايي چې دا کار به په دویم پړاو کې کوي، خو اوس چې اندېښنې ډېرې شوې دي او ښايي دویم پړاو ته د سولې تر رسېدو پورې خنډونه جوړ شي، نو اړتیا ده چې دا خبرې وشي. طالبان دې له امریکايي لوري سره د هغوی د ځواکونو د وتلو او تور لېست خبره کوي، خو پکار ده چې ورسره په څنګ کې له افغانانو سره د سیاسي روغې جوړې خبرې هم وشي. دا دوه متضاد حالتونه نه دي. که هممهاله له امریکا او افغانانو سره د طالبانو خبرې روانې وي، په دې کې کومه ستونزه نشته، خو ګټې پکې ډېرې دي او ډېرې اندېښنې ختمولی شي. له همدې امله طالبانو ته پکار ده چې په قطر کې د خپل سیاسي دفتر له لارې له افغانانو سره د خبرو لړۍ هم پیل کړي. نه یوازې په قطر کې، بلکې په کور دننه اړیکې او خبرې هم مهمې دي. طالبان اوس لویه برخه خاوره تر خپل کنټرول لاندې لري، که دوی وغواړي، په دغو سیمو کې له سیاسي ګوندونو، سیاسي فعالینو او خلکو سره پر راتلونکي نظام، د نظام پر ډول، اساسي قانون او نورو هغو مسایلو خبرې کولی شي چې خلک یې په اړه اندېښنه لري.
که طالبان له افغانانو سره خبرې پیل کړي، نو دا چاره به له یوه اړخه د سولې پر وړاندې د خنډونو او په دې برخه کې د شته اندېښنو مخه ونیسي او له بله اړخه به د سولې د پروسې په بریالیتوب کې مرسته وکړي. له همدې امله طالبانو ته پکار ده چې په دې اړه خپل نظر او دریځ ته د عمل جامه ور واغوندي او خلکو ته وښيي چې دوی له افغانانو سره خبرو او تفاهم ته ژمن دي.
