د سولې له خبرو سره هممهاله د ټاکنو په اړه ناندرۍ اوج ته رسېدلې دي. سره له دې چې په هېواد کې ډېرو سیاسي جریانونو په بېلو غونډو کې سوله تر ټاکنو مهمه او لومړیتوب بللې ده، خو حکومت پر ټاکنو ټینګار کوي چې دې مسئلې د طالبانو غبرګون هم پارولی دی. طالبان ټاکنې د پردیو په لاس کې بولي او وایي چې د خلکو رایې ته درناوی نه کېږي، نو ځکه په پوره توان هڅه کوي چې د ټاکنو مخه ونیسي.
د ولسمشریزو ټاکنو د نوماندانو ترمنځ ټاکنیزې سیالۍ پيل شوې دي. له دې سره هممهاله حکومت او ټاکنیز کمېسیونونه وایي چې ټاکنې به په ټاکلې نېټه تر سره کړي. د پارلمان ډېرو غړو هم تېره ورځ پر وخت د ټاکنو پر تر سره کېدو ټینګار کړی او له حکومت سره یې ژمنه وکړه چې د کال د نیمایي او ټاکنو بودجه به تصویب کړي.
بلخوا وسله والو طالبانو بیا د یوې اعلامیې په خپرولو سره ویلي چې دوی په هېڅ صورت په خپلو سیمو کې ولسمشریزو ټاکنو ته اجازه نه ورکوي. دوی نه یوازې د ټاکنو د مخنیوي خبره کړې ده، بلکې په ټاکنیزو کمپاینونو او په دې اړه په کېدونکو غونډو یې د بریدونو ګواښ هم کړی دی. وسله والو طالبانو پر خلکو غږ کړی چې په ټاکنیزو فعالیتونو کې دې برخه نه اخلي، ځکه ښايي د دوی د وسله والو تر برید لاندې راشي.
وسله وال طالبان وایي چې د ټاکنو ډېره برخه بودجه بهرنيان ورکوي، نو د بهرنیو ځواکونو په موجودیت کې ټاکنې تر سره کېدل ناسم دي او د ټاکنو پایله به له بهرنیانو سره وي. دوی د ۲۰۱۴ ز کال د ټاکنو بېلګه راوړې چې د خلکو رایو ته درناوی ونه شو او د امریکا د هغه مهال د بهرنیو چارو وزیر جان کیري په خپله خوښه حکومت جوړ کړ. د دوی په خبره، هغه مهال زرګونو خلکو رایه ورکړه او میلیونونه ډالر ولګول شول، خو وروستۍ پرېکړه بهرنیانو وکړه. دوی د راتلونکو ټاکنو په اړه هم دا وايي چې حکومت په ټول افغانستان کې ټاکنې نه شي تر سره کولی او په څو محدودو ولایتونو کې د ټاکنو تر سره کېدل د ټولو افغانانو استازیتوب نه شي کولی، نو ځکه دا یوه تېر اېستونکې پروسه ده.
بل پلو افغان حکومت بیا د طالبانو پر دې خبرداري هم توند غبرګون ښودلی دی. د ارګ له مطبوعاتی دفتره په خپره شوې خبرپاڼه کې راغلي، چې د وسله والو طالبانو د سولې هڅې نمایشي دي، ځکه دوی په عمل کې لا هم افغانان په مرګ ګواښي. په خبرپاڼه کې راغلي چې ټاکنې د ولس حق دی او افغانان د دې حق لري چې خپل زغیم پخپله وټاکي.
ارګ دغه راز پر ټولو امنیتي ځواکونو غږ کړی چې د ټاکنو امنیت خوندي کړي او طالبانو ته اجازه ور نه کړي چې دغه ملي پروسه زیانمنه کړي. په خبرپاڼه کې راځي: ((د افغانستان حکومت یو ځل بیا له ټولو بنسټونو څخه چې د ټاکنو تر سره کېدو کې ونډه لري، غواړي چې ټاکنې پر خپل ټاکلي وخت تر سره کړي. د افغانستان امنیتي او دفاعي ځواکونه چې د هیواد اصیل بچیان دي، په بشپړ ډول چمتو دي چې د افغانستان خلک له دغه ډول تهدیدونو څخه خوندي کړي او هېڅوک به پرې نږدي چې د دوی د برخلیک ټاکلو کې، د دوی د ګډون مانع شي)).
بل پلو د ټاکنو خپلواک کمېسیون هم پر امنیتي ادارو غږ کړی چې له دوی سره خپله همکاري ډېره کړي. د ټاکنو خپلواک کمېسیون وايي، دوی پر وخت د ټاکنو تر سره کېدو ته چمتو دي، خو امنیتي ادارو ته پکار ده چې له دوی سره د امنیت په تامین او امنه فضا کې د ټاکنیزو کمپاینونو تر سره کېدو کې همکاري وکړي.
تېره ورځ ډېرو نورو سیاسي ډلو او ګوندونو هم په یوه خبري غونډه کې ویلي وو، چې ټاکنو ته باید تر سولې لومړیتوب ور نه کړل شي. د دوی په باور، که سوله وشي، نو په افغانستان کې به شفافې او د ټولو اړخونو د منلو وړ ټاکنې تر سره شي.
