ټاکل شوې چې د وسله والو طالبانو یو پلاوی سبا اسلام اباد ته ورشي او هلته له پاکستاني چارواکو سره پر سوله او ځینو نورو مسایلو خبرې وکړي. دا پلاوی له قطر څخه ورځي او طالبانو هم دا سفر په رسمي ډول تایید کړی دی. پرون رویټرز اژانس ادعا کړې وه چې طالب استازي به د پاکستاني چارواکو ترڅنګ، د سعودي له ولیعهد محمد بن سلمان سره هم وګوري.
له مسکو، تهران او ځینو نورو هېوادونو وروسته د طالبانو رسمي پلاوی له قطره اسلام اباد ته هم ورځي. که څه هم ډېر طالب چارواکي په پاکستاني کې دي، خو دا چې طالبان له قطره ورځي او دا سفر په رسمي ډول اعلانوي، دا ښيي چې وسله وال طالبان ډیپلوماسي کوي او په سیمه کې خپل فعال رول څرګندوي. طالبان په داسې حال کې له سیمې او نړۍ سره خپل روابط پراخوي، چې افغان حکومت له یوه اړخه له سیمه ییزې انزوا سره مخ دی او له بله اړخه د امریکا په نوښت په پیل شوو خبرو کې هم ځای نه لري او ټولې خبرې د امریکا او طالبانو ترمنځ روانې دي. د خبرو په یوه برخه کې ان افغان سیاستوال ور ګډ شول، خو طالبان لا هم نه مني چې له حکومت سره به خبرې کوي.
روښانه ده چې پاکستان له قطري طالبانو ځینې غوښتنې لري، له همدې امله یې د سولې لپاره د ټاکل شوي مذاکراتي ټیم غړي هم قطر ته نه دي ور پرې اېښي او په قطر کې مېشت طالب استازي یې مجبور کړي چې اسلام اباد ته ورشي. طالبان غواړي د فبرورۍ د ۲۵مې له خبرو وړاندې، د دوی پلاوی بشپړ او پیاوړی شي، نو ځکه پاکستان ته ورغلي او د پاکستان ځینو غوښتنو ته به مثبت ځواب وايي.
د سولې په روانه پروسه کې چې پیل یې امریکا کړی، وسله وال طالبان ګټه کوي. همداسې سیمه ییز هېوادونه هم په پروسه کې داسې ښکېل شوي چې ګټې به یې خوندي کېږي. پاکستان چې د لوبې برخه دی، غواړي پر طالبانو کنټرول او نفوذ ولري او غواړي امریکا هم راضي وساتي. تر اوسه پورې پاکستاني چارواکي دا خبره کوي چې د سولې خبرې د دوی په مرسته روانې دي او له همدې امله امریکا نه یوازې پر پاکستان نیوکې نه کوي، بلکې خوشاله ده. په دې ډول د افغانستان د سولې له پروسې امریکا، طالبان او سیمه ییز هېوادونه ګټه کوي، خو افغانستان په خبرو کې نشته او طبیعي ده چې نشتون یې زیانونه لري.
حکومت باید لومړی ومني چې دریځ یې ناسم او د افغانستان پر زیان دی. له هغه وروسته باید له خلکو سره په مشوره یو داسې دریځ خپل کړي چې د سولې په روانه پروسه کې افغانان او افغانستان زیان ونه ویني. که حکومت د امریکا په نوښت په روانه پروسه شک لري، باید هر څه له خلکو سره شریک کړي او د امریکا د دغو کړنو مخه ونیسي. که هر څه سم روان وي، نو بیا پکار ده چې خلکو ته ډاډ ورکړل شي او په دې تړاو د خلکو هیلو او اندېښنو ته ځواب وویل شي. حکومت باید واضح کړي چې ورځ تر بلې زیاتېدونکې انزوا یې د افغانستان لپاره څه ګټه لري او د طالبانو او پاکستان وروستۍ خبرې له سولې سره څه مرسته کوي؟
