عبدالحق همکار؛ د ازبکستان د انرژۍ وزارت له مرستیال سره کتلي

د برېښنا شرکت اجرائیوي رییس عبدالحق همکار د ازبکستان د انرژۍ وزارت له مرستیال او تخنیکي مسوولانو سره په ګډه غونډه کې د سرخان–پلخمري د ۵۰۰ کیلوولټ برېښنا لېږد پروژې د پرمختګ، شته ستونزو او د پاتې چارو د چټکتیا په اړه خبرې کړې دي. د برېښنا شرکت د خبرپاڼې له مخې، همکار د دې پروژې پر ستراتیژیک او اقتصادي اهمیت ټینګار کړی او ویلي یې دي چې د پروژې بشپړېدل به د دواړو هېوادونو ترمنځ د انرژۍ او برېښنا سوداګرۍ د همکاریو پراختیا ته زمینه برابره کړي. په غونډه کې د پروژې د مالي سرچینو او تادیاتو، د سب‌سټېشنونو د تجهیزاتو جوړوونکو شرکتونو د معرفي کولو، د تخنیکي طرحو او اسنادو د بشپړولو، د تخنیکي او سوداګریزو اسنادو ترمنځ د اختلافونو د حل او د درول شویو ساحوي فعالیتونو د بیا پیل په اړه هم بحث شوی دی. دواړو لورو هوکړه کړې چې د شته خنډونو د لرې کولو، د اړوندو ادارو ترمنځ د همغږۍ د پیاوړتیا او د عملي چارو د چټکتیا لپاره ګډې هڅې زیاتې کړي، څو پروژه د ټاکل شوي مهالوېش له مخې بشپړه او ګټې اخیستنې ته وسپارل شي.