عدلیې وزارت: په بلخ کې ۲۵۰ جریبه ځمکه دولتي تثبیت شوه

د عدلیې وزارت د خبرپاڼې له مخې، د بلخ ولایت په مرکز مزارشریف ښار کې د حاجي عبدالباقي او حاجي اسماعیل فارم په نوم شاوخوا ۲۵۰ جریبه ځمکه، د اسنادو او مدارکو تر ارزونې وروسته، دولتي تثبیت شوې ده. د وزارت په وینا، دغه ځمکه د مزارشریف ښار په اتمه ناحیه کې موقعیت لري او د شمال زون د امارتي غصب شویو ځمکو قضیو ته د رسېدنې ځانګړې محکمې د اړوندو اسنادو له ارزونې وروسته په اړه پرېکړه کړې ده. د عدلیې وزارت زیاته کړې، چې د ځمکې دوسیه تر دې وړاندې د ځمکو له غصب څخه د مخنیوي او د غصب شویو ځمکو د بېرته ترلاسه کولو کمېسیون له لوري څېړل شوې او د قانون د ۱۷مې مادې له مخې ځانګړې محکمې ته سپارل شوې وه.