هواوې شرکت p30 موبایل بازار ته وړاندې کوي

په هالنډ کې د هواوې شرکت وایي، د روان زېږديز کال په وروستیو کې غواړي p30 موبایل بازار ته وړاندې کړي. دا په داسې حال کې ده چې سامسونګ، اېل جي او سوني شرکتونه بیا غواړي د روانې فبرورۍ په وروستیو کې د موبایل په برخه کې خپل تر ټولو مخکښ تولیدات معرفي کړي. هواوې شرکت د خپل دغه برنډ په اړه تر اوسه اضافي معلومات نه دي خپاره کړي، خو خپلو مینوالو ته یې ویلي، چې یوازې د مارچ میاشتې تر وروستیو پورې دې په تمه شي او په داسې محصول به یې ونازوي، چې په اړه یې تر اوسه هېڅ فکر نه وي کړی. د هواوې شرکت د برنډ ډېری کاروونکي بیا وایي، کېدای شي په نوي برنډ کې دومره بدلونونه نه وي راغلي، ځکه دغه شرکت تېر کال خپل  p20موبایل بازار ته وړاندې کړ. په دغه شرکت کې ځینو پټو سرچینو ویلي، چې د P30 یوه ځانګړنه به دا وي، چې مخپاڼه به یې له پخوانیو موبایلونو څخه یوڅه لویه وي او داسې یوه کامره به لري، چې د دغه برنډ کاروونکو تر اوسه پورې نه وي کارولې. د ټکنالوژۍ دغه شرکتونه هڅه کوي چې هر کال په یوه نوې بڼه موبایلونه بازار ته وړاندې کړي او خلک ور جذب کړي.