د امريکا د ماليې وزیرې جېنیټ ايلين یوه اقتصاد پوهه ده، خو نوموړې پدې وروستيو کې د اقتصادي قانون پرخلاف څرګندونې کړي او په انټرنېټ کې پرې خلکو خندلي دي.
جېنیټ ايلين د امريکا په جیورجيا ایالت کې د فوتوالټيک بيټرۍ له يوې فابریکې څخه د لېدنې پر مهال ويلي، چې د چين د نوې انرژۍ د توليداتو توليدي توان له بازاري اړتياوو ډېر زیات دی، چې له امله یې په نړۍ کې د نوې انرژۍ د توليداتو په بیو او تولیدي موډل کې غير عادي بدلونونه رامنځته شوي او د امريکايي تصديو او کارګرانو ګټو ته زيان رسېدلی دی.
جېنیټ ايلين ویلي، چې هغه به اقدامات غوره کړي ، څو امریکايي کمپنیو او کارګرانو ته په عادلانه سيالیو کې د ګډون زمينه برابره کړي.
د جېنیټ ايلين پر يادو څرګندونو ډېرو امريکايانو خندلي دي. ځينو انټرنېټ کاروونکو په تبصرو کې ليکلي: امريکا په لومړيو کې پدې باور وه، چې چين د پاکو انرژیو د کارولو په برخه کې هڅه نه کوي، خو اوس يې بيا شکايت کړی، چې چين په همدې برخه کې ډېر کارونه کړي. ولې امریکا خپل تمرکز پر خپل کار نه، بلکې پر نورو هېوادونو کوي.
ځينو نورو انټرنېټ کاروونکو بيا ويلي: که امریکا د سیالۍ ګټې پیدا کړي، دغه هېواد به له نورو هېوادونو وغواړي، چې د ازاد بازار د اصولو مراعات وکړي، که ګټې يې نه وي، نو سوداګريز پروټېکنیزم يا د سوداګرۍ د حمايت غوښتنې څپه به پورته کړي.
د امريکايي انټرنېټ کاروونکو يادو څرګندونو د ځينو امريکايي سياستوالو منافقت او دوه ګونی معيار رسوا کړی دی.
په حقیقت کې چين د زرغون پرمختګ يا د چاپېريال ساتنې لپاره د ګټور پرمختګ ډېرې هڅې کړې دي. چين د نړۍ په لویو هېوادونو کې تر ټولو مخکې موخې ټاکلي، چې له ۲۰۳۰م کال مخکې به په خپل هېواد کې د کاربن ايستلو اندازه اوج ته ورسيږي او له ۲۰۶۰ م کال مخکې به د کاربن خنثی کولو بهیر بشپړ کړي.
په ۲۰۲۳م کال کې د چين برېښنايي موټرونه، د ليتيم بيټرۍ او د سولر بیټرۍ نورو هېوادونو ته ډېرې صادرې شوي او د صادراتو عمومي ارزښت يې يو ټريليون او ۶۰ ميليارډه يوانو ته رسېدلی، چې دغه رقم د ۲۰۲۲م کال په پرتله ٪۳۰ زياتوالی ښيي.
چين د خپل پرمختګ ترڅنګ له نورو هېوادونو سره د زرغون پرمختګ مرسته هم کوي. چيني تصدۍ سي اي اي سي (CEEC) د سعودي عربستان د مکې په جده ښار کې د الشبه فوټووالټيک برېښناکوټ د جوړولو په هڅه کې ده. دغه بریښناکوټ به د ۲۸۲ ميليارډه او ۲۰۰ ميليونه کيلوواټ برېښنا د تولید ظرفیت ولري او د کاربن د ايستلو اندازه کې به د ۲۴۵ ميليونه ټنو کموالی راولي.
د انرژۍ نړيوالې ايجنسۍ وړاندوينه کړې، چې په ۲۰۳۰ م کال کې به د نړۍ د تجدید وړ انرژۍ یوازې د ٪ ۸۰ جنراتورونو د درولو اړتياوې پوره کولی شي. د چين رسمي شمېرې ښيي، چې په ۲۰۲۳م کال کې د دغه هېواد د برېښنايي موټرونو د توليد او پلور اندازه په جلاجلا توګه ۹ ميليونه او ۵۸۷ زره عرادې او ۹ ميليونه او ۴۹۵ ميلیونه عرادې ښودل شوې. دغه راز په دغه هېواد کې د بېلابېلو ډولو بيټریو د توليد او پلور اندازه په جلاجلا توګه ۷۷۸.۱GWh او ۷۲۹.۷ GWh ښودل شوې ده. دغو شمېرو ثابته کړې، چې هغه څرګندونې بيخي بې اساسه او له حقیقت لېرې دي، چې وايي د چين د نوې انرژۍ د توليداتو توليدي توان له بازاري اړتياوو ډېر زیات دی.
سپينې ماڼۍ څه موده مخکې د انفلاسيون د کمښت قانون خپور کړ، چې له مخې يې که امريکايي مشتريان د چيني تصديو لخوا بسته بندې او توليد شوې بيټرۍ واخلي، نو له ۷۵۰۰ امريکايي ډالرو مالياتو څخه به معاف نه شي.
د امريکا ورته ډوله مقرراتو په نړيوال بازار کې عادلانه سيالۍ له ستونزو سره مخ کړې، نړيوال تولیدي او اکمالاتي ځنځيرونه یې خراب کړي او د سوداګرۍ نړيوال سازمان او بازاري اقتصاد له اصولو څخه یې هم سرغړونه کړې ده، چې د امريکا د متحدينو په ګډون د ډېرو هېوادونو لخوا په کلکه غندل شوي دي.
د امريکا د مشهور فکري مرکز بروکينګس موسسې يو کارپوه وايي، که امريکا او چين د پاکو انرژیو د تخنيکونو په برخه کې ګډې همکارۍ وکړي، نو د کاربن د ايستنې په کمښت کې او د دواړو هېوادونو ترمنځ د متقابل باور په زياتولو کې ډېره مرسته کولی شي، که دواړه هېوادونه ګډې همکارۍ ونه کړي او يو بل سيال وګڼي، نو د نړيوال اکمالاتي ځنځير او د اقليمي بدلون د مخنيوي لپاره د نړۍ ګډې هڅې به له ډېرو ستونزو سره مخ وي.
اوسمهال د نوې انرژۍ په برخه کې د هېوادونو ترمنځ همکارۍ ډېر امکان لري. د چين او امريکا مشرانو تېر کال د امریکا په سان فرانسیسکو ښار کې سره وکتل او د اقليمي بدلون د مخنيوي په برخه کې یې د دواړو هېوادونو ترمنځ د ګډو همکاريو د پیاوړتيا اعلاميه خپره کړې ده. ځينې امریکايي سیاستوال دې د چين لخوا برابر شوي فرصتونه وګوري او د اقتصادي قانون مراعات دې وکړي، څو د خپل هېواد د پاکې انرژۍ د پرمختګ سمه لار پيدا کړي.
