څو میاشتې کېږي چې د سولې خبرې روانې دي. که څه هم اوربند نه دی شوی، خو خلک تمه لري چې د سولې خبرې به د دې سبب شي چې د جګړې شدت را کم شي. اوس داسې ښکاري چې څومره چې د سولې خبرې ګرمیږي، ورسره د جګړې شدت هم زیاتیږي. تازه په افغانستان کې د ناټو او امریکايي ځواکونو عمومي قوماندان د کورنیو چارو او دفاع وزارتونو له سرپرستانو او د ملي امنیت له رییس سره ګډه غونډه کړې ده. د کورنیو چارو سرپرست وزیر ویلي، تر سولې به جګړه کوي او په دې غونډه کې هم پر همدې چاره خبرې شوې دي.
اوس داسې ښکاري چې د خلکو د تمې خلاف نه یوازې دا چې جګړه کمېږي نه، بلکې زیاتیږي. په دې وروستیو ورځو کې له بدخشان، تخار، بغلان، کندوز، فاریاب، هلمند، اروزګان، زابل او ګڼو نورو ولایتونو کې د سختو جګړو رپوټونه ورکړل شوي دي چې پکې ګڼو امنیتي ځواکونو او طالبانو ته مرګ ژوبلې اوښتې ده. له دې سره په یوه وخت لا هم د ګډو ځواکونو شپني عملیات روان دي چې پکې نږدې هره شپه د ملکي وګړو د مرګ ژوبلې خبرونه هم ورکول کېږي.
ښايي یو لامل دا وي چې ښکېل لوري په جګړه کې د فشار له لارې غواړي ځان برلاسی وښيي او ډېر امتیاز تر لاسه کړي، خو دا چاره له شک پرته پر سوله، د سولې پر هڅو او پایلو ناوړه اغېزې کوي. اوس په کلیوالو سیمو کې وسله وال طالبان تر فشار لاندې دي او که فشار همداسې وي او د سولې خبرې کومه پایله ونه لري، نو دوی به پر خپلو مشرانو فشار راوړي او ترې وبه غواړي چې دا خبرې ودروي. د وحشت او جګړې هر ګام د سولې پر ضد ګام دی، نو دا فکر سم نه دی چې د فشار له لارې به مقابل لوری د داسې غوښتنو منلو ته اړ شي چې پخوا یې منلو ته تیار نه و. دا جګړه او فشارونه اتلس کاله روان وو، خو نه یوازې دا چې کوم لوری یې کمزوری نه کړ، بلکې د سولې پر وړاندې یې خنډونه زیات کړل او ډېر افغانان یې تر خاورو لاندې کړ. له همدې امله دا ناسم فکر دی او په ښکاره د سولې ضد هڅه ورته ویل کېدای شي.
اوس چې خلیلزاد په کابل کې دی او ټاکل شوې چې څو ورځې وروسته قطر ته ورشي او هلته خبرې پیل کړي، نو د خبرو یو بنسټیز ټکی باید اوربند او د جګړې د شدت را کمول وي. که اوس اوربند نه کېږي، نو لږ تر لږه د جګړې شدت خو دې را کم شي او یا دې د جګړې شدت نور نه زیاتیږي. وسله وال طالبان، حکومت او امریکایان که رښتیا سوله غواړي، نو لومړنی ګام یې باید همدا وي چې د جګړې شدت را کم کړي، د حسن نیت په خاطر دې نور ګامونه واخلي او ډېر ژر دې اوربند ته لاره هم هواره کړي. له دې پرته پر جګړه ټینګار او د وحشت زیاتول د سولې ضد هڅه ده او یوازې د سولې دوښمنان پکې ګټه کوي.
