پاکستان؛ د موسمي بارانونو له امله د مړو شمېر ۱۲۶ ته رسېدلی دی

د پاکستان د طبیعي پېښو پر وړاندې د مبارزې ملي ادارې (اېن‌‌ډي‌اېم‌اې) ویلي، چې د روانو موسمي بارانونو او سېلابونو له امله د جون له ۲۶مې څخه د اګست تر لومړۍ نېټې پورې په ټول هېواد کې ۱۲۶ کسان مړه او ۴۰۴ نور ټپیان شوي دي. د یادې ادارې د تازه شمېرو له مخې، تر ټولو ډېره مرګ‌ژوبله په خیبرپښتونخوا کې ثبت شوې، چې ۵۵ کسان په‌کې مړه شوي دي. ورپسې په پنجاب کې ۴۷، د پاکستان تر کنټرول لاندې کشمیر کې ۱۰، بلوچستان کې ۸، سند کې ۵ او ګلګت بلتستان کې یو کس ژوند له لاسه ورکړی دی. اېن‌‌ډي‌اېم‌اې زیاته کړې، د دغو مرګ‌ژوبلو ډېری پېښې د کورونو د چتونو د پرېوتو له امله رامنځته شوې دي.