په جګړه کې ښکلا، په نوم د افغانستان د عکاسې فاطمې حسيني د عکسونو نندراتون د سپتمبر په ۱۷مه نېټه د سونګ چينګ لينګ د ماشومانو او ځوانانو د ساينس او کولتور د تبادلې په مرکز کې پرانيستل شو. د چين د بهرنيو چارو وزارت د تګلارو او پلانونو د رياست د مشر او په افغانستان کې د چين د پخواني لوی سفير ليو جين سونګ او په چين کې د افغانستان د سفارت د لنډ مهالي شارژدافير موسی عارفي په شمول د چين کمونېست ګوند د مرکزي کمېټې د بهرنيو اړيکو د څانګې، د چين د روغتيا او طب د ملي کمېټې، د چين د ښځو د اتحاديې، د چين د ډيپلوماتيکو چارو د ټولنې او د چين د عکاسانو د ټولنې کابو دوه سوه چيني او بهرني شخصيتونه د دغه نندراتون په پرانيستونکو مراسمو کې حاضر وو.
ښاغلي ليو جين سونګ په خپله وينا کې وويل، له بده مرغه، له ۴۰ کلونو راهيسې افغانستان د جګړې په حال کې دی، خو افغان ملت زړه ور او متانت لري او جګړه د ښکلا د پيدا کولو او لټولو په لاره کې د افغانانو ګامونه نه بندوي. موږ له داسې عکسونو څخه د افغانستان د ښځو ښکلا، د کلتور ښکلا او د سولې ښکلا احساسولی شو. يو عکس تر زرو خبرو لا څرګند دی. د هر يو عکس تر شا په زړه پورې کيسه شتون لري. په داسې عکسونو کې وخت پاتی کېږي، تاريخ يادېږي او راتلونکې ته تمه ده.
د سږ کال د اګست ۱۹مه نېټه د افغانستان د خپلواکۍ د بېرته اخيستلو له سلمې کاليزې سره برابره ده. افغانستان هيڅکله د نن ورځې په شان سولې ته نژدې شوي نه دي او دومره کسان او ځواکونه د سولې لپاره د هڅه کولو په حال کې دي، خو افغانستان هم هيڅکله د نن ورځې په شان له دومره زياتو ننګونو او ستونزو سره مخامخ نه دي. له زور زياتۍ څخه لاس اخيستل، سياسي مشوره، ملي روغې جوړې او اقتصادي بيارغونه د څه باندې ۳۰ مليونه تنو افغان وروڼو او خويندو ګډ آميد دی او د دې سيمې د بېلا بېلو هېوادونو او نړيوالې ټولنې ګډه هيله هم ده. چين د افغانستان د ښه ګاونډ او صميمي دوست په توګه په جګړه کې د افغانانو، په تېره بيا د افغان ښځو غمونه احساسولی شي. چين تل په افغانستان کې د سولې او پخلاينۍ د رامنځته کېدو لپاره کوښښ کوي. چين په ټينګار سره د افغانانو په لارښوونې سره او د افغانانو تر کنترول لاندې له جامع سوله ييز بهير څخه ملاتړ کوي او د دې پلوي کوي چې د افغان مسئلې په اړه به د اړوندو خواوو خبرې اترې پياوړې شي او د ښځو لپاره به د ژوند د ښه والي پروژې تر سره شي.
آغلې فاطمې حسيني وويل، جګړه ډېره سخته ده، په تېره بيا ښځې په جګړه کې له زياتو ستونزو سره مخامخ دي. هيله لرم چې د خپلو کمرو له لارې د افغان ښځو افتخار او استواري څرګنده کړم چې که څه هم دوی له مختلفو ستونزو سره مخامخ دي، خو پر لا روښانه، ښکلې او زغمناکې بڼې ټينګار کوي. دوی د قيد په شان چادرۍ غورځوي او د مختلفو قومونو جامې اغوندي. دوی د رنګونو او وړانګو د قوتونو له لارې د ننګونو د له منځه وړلو، د ازادو افکارو او د خپل ارزښت د څرګندولو په برخو کې د افغان ښځو زړه ورتوب او ځانګړتيا څرګندوي.
فاطمه حسيني د افغانستان په هنري ساحه کې يوه عکاسه ده. هغه په وار سره د ايران د تهران پوهنتون د عکاسۍ د بکلوريا ليسانس او د ازاد پوهتون د صنعتي او انجنيري بکلوريا ليسانس تر لاسه کړی او له دې نه وروسته يې په کابل کې د ماستورات په نوم يو هنري سازمان جوړ کړ. فاطمه حسيني د عکسونو له لارې په بېلا بېلو خواوو او کچو د افغانستان د ښځو کيسې څرګندوي. د دې عکسونه په ايران، امريکا، هند، ترکيې، کوريا جمهوريت، اطریش، ډنمارک، ايټاليا او فرانسې په شمول زياتو هېوادونو کې نندارې ته وړاندې شوي دي.
په بېجينګ کې ياد نندراتون په افغانستان کې د چين د سفارت او د سونګ چينګ لينګ صندوق تر ملاتړ لاندې تر سره کېږي.
