څنګه له حاسدو کسانو د خپلې بریا لپاره استفاده وکړو؟

کله چې د بریالي کس په نوم وپېژندل شوی، حتمن به تاسې له هغو حاسدو کسانو، مانا له هغو کسانو سره چې ستاسې بریا نه شي زغملی، مخ کېږی.

حاسد کسان یا ستاسې با ارزښته اوسېدل نه شي منلی یا ممکن ستاسې د بریا له رازونو سره حسد او کینه ولري.

حاسد کسان په ساده‌ګۍ له نورو سره خپل حسادت ښيي، په داسې حال کې چې موږ انسانان فطرتاً دا ښه نه ګڼو چې نور مو حسد کوونکي وبولي یا هغوی داسې ګومان وکړي چې پلانی حاسد دی، خو اصلي خبره دا ده چې په ټوله مانا له حاسدو کسانو لرې اوسېدل ناممکن دي، په تېره بیا هغه وخت چې تاسې د بریا پر لور روان یاست.

نو له دې سره سره چې له هغوی په ټوله مانا لرې اوسېدل، ناممکن دي، هغوی ته وخت ورکړئ، څو له تاسې سره حسد وکړي او تاسې یې د حسد له اغېزو د خپلې بریا لپاره بیا استفاده وکړئ.

په همدې مقاله کې ځینو هغو مواردو ته اشاره کوو چې په واسطه یې تاسې له حاسدو کسان څخه د خپل موفقیت لپاره استفاده وکړی.

۱ـ که هغوی له تاسې سره حسد کوي، پوه شی چې تاسې د ځان لپاره سمه لار ټاکلې ده

له تاسې سره د نورو کسان حسد کول دا مانا لري چې تاسې د بریا لوړ پوړ ته رسېدلي یاست یا مو داسې لاره ټاکلې ده چې پر مټ یې ښو ځایونو ته رسېدلی شی. هغه وخت چې تاسې د بریا لار پرېږدی یا کومه سمه موخه ونه ټاکی، باوري اوسی چې هغه وخت به له تاسې سره هېڅوک حسد ونه کړي.

کله چې حاسد کسان له تاسې او ستاسې له کارونو سره حسد کوي، پوه شی چې هغوی ستاسې د بریا په راز پوه شوي دي. د یو چا حسد په دې مانا واخلئ چې تاسې سم کارونه کوی او هغوی یې نه شي زغملی. نه دا چې تاسې د هغوی په مقابل کې په ورته اقدام لاس پورې کړئ.

۲- د هغوی له اخلاقو او کړنو زده کړئ چې تاسې د نورو خلکو منونکي واوسئ

د نورو له بدو او ناخوښو کړنو نه په زده کړې، تاسې کولای شی د خپلو ملګرو او هغو کسانو لپاره چې تاسې ورسره ناسته پاسته لری، یو ښه انسان واوسئ. د هغو کسانو په مقابل کې چې له نورو سره حسد کوي، تاسې د هغوی خلاف کړنه خپله کړئ، مانا دا چې تاسې له نورو سره حسد مه کوئ. که تاسې هم د هغوی په مقابل کې ورته عمل تکرار کړی، دا به نه یوازې ستاسې او هغه کس، بلکې د نورو لپاره هم یو بد د تقلید عمل وي چې له تاسې به یې زده کړی وي.

له دې وروسته، کله چې له هغو کسانو سره مخ کېږی چې له تاسې سره همفکره او هم نظره وي، د هغوی ملاتړ وکړئ او د هغوی لپاره یوه انګېزه شی، دا به نه یوازې ستاسې اړیکې له هغوی سره ټینګې کړي، بلکې معنوي روحیه به مو هم پياوړې او نورو ته به یوه ښه الګو ګرځېدلي یاست.

۳- د هغوی له نیوکو د خپلې ارزونې لپاه ګټه واخلئ

ډېر وخت انتقادونه د حسد له مخې کېږي، کېدای شي ځینې وخت له همداسې نیوکو سره مخ شی. په داسې وخت کې باید نا راحته نه شی، بلکې هغه خبرې چې هغوی یې ستاسې په مقابل کې کوي، ښې واورئ. ځینې وخت نیوکې او انتقادونه له تاسې سره مرسته کوي چې پر یوه ښه کس بدل شی. مانا دا، کومې نیوکې چې هغوی یې پر تاسې کوي، هغوی د حسد له مخې د دې لپاره کوي، څو تاسې پرې کمزوري ښکاره کړي، خو تاسې د هغوی برعکس د خپلو نیمګړتیاوو د ډکولو لپاره هڅه وکړئ.

۴- متواضع اوسئ

له انتقادونو او نیوکو سره کېدای شي د ځان لپاره سخت، خو ممکنې او لاسته راوړونکې موخې وټاکی. په ژوند کې ډېرې داسې صحنې راځي چې یا به ورسره مقابله کوئ او یا به مو خپل کار سم سرته رسوی. کېدای شي تاسې له هغو کسانو په څو څو واره بریالي وی، کوم چې له تاسې سره حسد کوي. مانا دا چې تاسې باید متواضع اوسی، نه داسې چې مخکې له مخکې پر ځان د ډېر باور له امله د هر شي او ځان په اړه خپله پرېکړه ومنی. د هغوی د حسد په مقابل کې د هغوی د خبرې او پرېکړې په اړه فکر وکړی، که پر ځای وه، ګټه ترې واخلئ او که د حسد له مخې وه، شاته یې وغورځوئ.

۵- له حاسدینو څخه د خپلو ستونزو د حل لپاره ګټه واخلئ

له حاسدو کسانو سره اوسېدل په ټولو ستونزو سربېره دا ښه چانس هم په لاس درکوي، څو مو خپلې ستونزې د اغېزمنو او هغو لار چارو په واسطه حل کړی، کومې مو چې تر اوسه نه دي کارولې.

کېدای شي ځینې وخت یوازې همدا بس وي چې د هغوی په مقابل کې کوم عکس العمل او خبره ونه کړی، خو پام مو وي چې له هرځل نیوکې سره باید تاسې همدا عمل تکرار نه کړئ، بلکې د بل ځل نیوکې په مقابل کې باید ستاسې برخورد له لومړي سره یو څه توپير ولري.

۶- خپله غوسه مو کنټرول کړئ

د غوسې کنټرول سخت کار دی. کېدای شي ځینې کسان داسې یو کار وکړي چې تاسې په څو دلایلو په غوسه کړي، خو د داسې یو کار په وړاندې دا یاد ساتئ چې خپل عکس العمل لږ په سړه سینه وښيئ.

له ټولو هغو بدو او منفي کلماتو او خبرو چې یو څوک یې تاسې ته وايي، د ځان په ګټه استفاده وکړئ. مانا دا چې یا د هغوی په مقابل کې ژر عکس العمل مه ښيئ او یا هم لږ په سړه سینه او ارامه هغوی ته ځواب ووایی.

که په داسې یوه صحنه کې مو خپله غوسه کنټرول کړه، پوه شی چې تاسې پر نفس او هرڅه کنټرول ترلاسه کولای شی.

۷- د حاسدو کسانو منفي اغېزې چې پر تاسې یې کوي، بابېزه وګڼئ

په ژوند کې حتمن له حاسدو او منفي کسانو سره مخ کېږی. موږ نه شو کولای ټول خلک د ځان دوستان کړو، نو په همدې اساس کولای شو له حاسدو کسانو د خپلو بریاوو او نیمګړتیاوو د لا ښه پېژندلو او بیا ځلي نه تکرار لپاره ګټه واخلو.

دا منل چې موږ نه شو کولای ټول له ځانه خوشحاله وساتو، دا فرصت په لاس راکوي چې پر خپلو هغو موخو تمرکز وکړو، کومې چې ډېر اهمیت لري.

۸- له حاسدو کسانو د خپلې تجربې د پياوړي کولو لپاره ګټه واخلئ

ممکن د داسې کسانو له نیوکو سره مخ شی چې هغوی مو شخصیت او باورونو ته زیان ورسوي، خو له دې سره سره ځان د هغوی د نیوکو قرباني مه کوئ. دا چې تاسې د هغوی د توجه وړ ګرځېدلي یاست، پر همدې افتخار وکړئ، ځکه نابود او کم ارزښته شیان د سړي توجه نه جلبوي.

که پوه شی چې څنګه یاست او څنګه مو زړه غواړي چې ژوند وکړی، هغه وخت کولای شی ازاد ژوند وکړی. دا ډول ژوند کول مو د خپلې خوښې تر بریاوو رسوي.