د ۲۰۲۲ کال د فوټبال نړيوال جام د نومبر په ۲۰مه نېټه په قطر کې پرانيستل شو او لاهم روان دی. د امريکا د ډیپلومات مجلې په وروستيو کې د يوې مقالې په خپرولو سره ويلي، چين چې له قطر سره دوستانه اړيکې لري، د ۲۰۲۲ کال د فوټبال نړيوال جام لپاره ډېر خدمتونه کړي دي او د دې نړيوال جام لپاره يې ډېر چينايي توليدات برابر کړي دي. دا حقيقت دی چې د دې جام سپورټي ميدان او د سوغات اکثریت شیان په چین کې تولید شوي دي. نوځکه سږني نړيوال جام د نړيوالو پام راجلب کړی دی. د افغانستان د شرق راډيو خبريال فیصل ظريفي چې له فوټبال سره ډېره علاقه لري، هم د فوټبال سږنی نړيوال جام تعقيبوي. که څه هم په دې نړيوال جام کې افغان لوبډلې برخه نه ده اخيستې، خو لوبه څاري. د ده په اند د فوټبال سږنی نړيوال جام له نورو نړيوالو جامونو سره ډېر توپير لري. نوموړي د چين د ميډيا ګروپ له خبريالې سره د مرکې په ترڅ کې ويلي چې چين د فوټبال سږنی نړيوال جام رنګين کړی او يوازې يې په ساختماني برخه کې نه، بلکې په ټولو برخو کې يې خدمتونه کړي چې دغه نړيوال جام په ډېرې عصري تکنالوژۍ په درلودلو سره روان دی.
د ښاغلي ظريفي په وينا چين پياوړی توليدي توان لري. څرنګه چې چيني توليدات هم په افغانستان کې ډېر ليدل کيږي، لکه ټیلېفونونه او اړوند وسایل يې، ټلوېزیون او ډېر زيات نور چینايي توليدات په دې هېواد کې پيدا کېږي. نو هغه تل له چيني توليداتو څخه جاليبه خاطره لري او د فوټبال په سږني نړيوال جام کې يې خاطره لا ژوره کړې ده. ځکه چې د فوټبال په سږني نړيوال جام کې ډېر توليدات او تاسيسات هم د چيني تصديو له خوا جوړ اوتوليد شوي دي. د بېلګې په توګه د قطر د لوسېل سپورتي میدان چې په دې هېواد کې تر ټولو لوی سپورتي ميدان ګڼل کيږي، د يوه چيني شرکت له خوا جوړ شوی او عکس يې اوس د قطر په بانک نوټ کې چاپ شوی دی. د معلوماتو له مخې د فوټبال نړيوال جام پايلوبه به هم په همدې سپورتي ميدان کې تر سره شي. سربېره پردې چين هم د(Alkasa) د لمريزې انرژۍ برېښناکوټ په جوړولو کې برخه اخيستې وه چې دا د دې نړيوال جام د جوړېدو لپاره د انرژۍ په برابرولو کې مهمه ونډه لري. سربېره پردې چين د سږني نړيوال جام لپاره هم د نوې انرژۍ ډیربسونه برابر کړي دي. ويل کيږي چې دا ښايي د دې نړيوال جام لپاره د چين يو مهم خدمت وي. په دې اړه ښاغلي ظريفي وويل، د فوټبال نړیوال جام چې په قطر کې ترسره کیږي واقیعآ چې لوبغالي یې په ډیر کم وخت کې او ډیره په معیاري توګه جوړ شوي چې په دې جمله کې يې دوه لوبغالي ډیر حیرانوونکي دي. لوسیل لوبغالی واقیعآ چې ډیر ښه لوبغالی دی او پکې شاوخوا۹۰ زره کسان د سیالۍ ننداره کولی شي. نو زما په اند چین یوازې په ساختماني کارونو کې نه بلکې په هره برخه کې ډیر پرمختلی هیواد دی لکه څنګه چې ما مخکې یادونه وکړه چې دا ځل نړیوال جام کې زیات نوښتونه لیدل کیږي او ټول لوبغالي یې په معیاري توګه او په دومره کم وخت کې جوړ کړي چې دا ډیر د حیرانتیا خبره ده. موږ هره ورځ په تلويزيون کې لوبې او دا لوبغالی وينو او په دې اند يم چې د چین خدمات ډیر موثر دي.
سربېره پردې د بريټانيا د نړيوالو شمېرنو د شرکت په خوله چینی تصديو د سږني نړیوال جام لپاره ۱،۴ ميليارد ډالره مرستې کړې چې دغه رقم د امريکايي تصديو له خوا له برابرو شويو مرستو څخه اوښتی دی او له دې کبله يې چيني شرکتونه په روان نړيوال جام کې تر ټولو لوی سپانسر ګرځېدلی دی. ښاغلي ظريفي د دې ټکي د يادونې په ترڅ کې داسې ویلي، کومه مرسته چې چین هیواد کړې په دې نړیوال جام کې دا ډیره ستره مرسته ده. موږ د چین دا کړنه ستایو چې د ورزش په برخه کې یې په دومره لوړه کچه مرسته کړې. د فیفا نړیوال جام دا ځل چین رنګین کړی ځکه د بسونو خدمات، دبریښنا خدمات چې دا اړین شیان دي او چین چمتو کړي نو زما په اند د ۲۰۲۲ کال فیفا نړیوال جام چین رنګین کړی او یوازې په ساختماني برخه کې يې نه بلکې په ټولو بر خو کې یې خدمت کړی دی.
ښاغلي ظريفي نه يوازې په سږني نړيوال جام کې د چين خدمتونه ستايل بلکې ويې ویل چې چیني شرکتونه او تصدۍ به په نژدې راتلونکې کې د افغانستان د کرکټ له سياليو سره مرسته وکړي او سپانسر به يې کړي. هغه وويل، دا چې افغانستان اوسمهال په نړۍ کې د کرکټ داسې لوبډله لري چې هرې لوبډلې ته ماتې ورکولی شي خو تر اوسه معیاري لوبغالي نه لري نو د لوبغالو په جوړولو کې د چین مرسته تر ټولو ډیره اړینه ده.
撰稿：余海芳 初审：唐诗玉 审定：陈重 签稿：席猛）（
