د کاپیسا قومي مشران: که حکومت د عامو خلکو وژنې ته ادامه ورکړي پاڅون کوو

د کاپیسا یو شمیر قومي مشران د ګډو ځواکونو له خوا د عامو خلکو پر وژل کېدو نیوکه کوي. دوی په کابل کې د یوې غونډې پرمهال په کاپیسا، میدان وردګو او یوشمېر نورو ولایتونو کې هوايي بریدونو ته په اشارې، چې پکې ملکي کسان وژل شوي ویلي، حکومت دې د عامو خلکو له وژلو لاس واخلي او د ګډو ځواکونو عملیات دې ژر تر ژره ودروي. دوی وايي، چې په کاپیسا کې د وروستي هوايي برید له امله د ښځو او ماشومانو په شمول ګڼ عام خلک ووژل شول خو تر اوسه یې چا پوښتنه نه ده کړې. دوی خبرداری ورکوي، که یې حکومت غږ وانه وري او ژر تر ژره شپني عملیات ونه دروي، د حکومت پر ضد به پاڅون وکړي. د تګاب ولسوالۍ دغه قومي مشران په داسې حال کې پر حکومت نیوکه کوي چې څو ورځې وړاندې د کاپیسا ولایت د تګاب ولسوالۍ په بدراب سیمه کې پر یوه کور هوایي برید کې د یوې کورنۍ اتلس غړي وژل شوي دي.