ازبکستان له افغانستان سره د سیمه‌ییز اتصال پر پراخېدو ټینګار کړی

د ازبکستان د بهرنیو چارو وزیر بختیار سعیدوف او مل پلاوي یې د افغانستان د کورنیو چارو له سرپرست وزیر سراج الدین حقاني او د دغه وزارت له امنیتي او اداري مرستیالانو سره کتلي دي. په دې لیدنه کې د افغان-ټرانس درې اړخیزې رېل پټلۍ د شونتیا د ارزونو هوکړې جزییات شریک شوي، او دواړو خواوو د افغانستان او ازبکستان د اړیکو د پراختیا هیله څرګنده کړې ده. بختیار سعیدوف ویلي، هېواد یې د افغانستان د کنګل شویو شتمنیو د خلاصون، د افغان کډوالو د ستونزو د حل، او نړیوالو غونډو کې د سرپرست حکومت د حضور ملاتړ کوي. سراج الدین حقاني هم هیله ښودلې چې افغان-ټرانس پروژه به د افغانستان، ازبکستان او پاکستان ترمنځ د اقتصادي همکارۍ یوه مهمه لاسته‌راوړنه وي، او ټینګار یې کړی چې کابل غواړي له تاشکند سره په سیاسي، اقتصادي او فرهنګي برخو کې اړیکې لا پیاوړې کړي.