ټرمپ او نتنیاهو؛ د انسان وژنې د شریکې سناریو دوه مخونه!

نړۍ د داسې یو خونړي فصل شاهده ده چې انسانیت پکې د بمونو، لوږې، او ظلمونو تر خاورو لاندې کېږي، او د غزې د مظلومو خلکو آهونه تر آسمانه رسېږي. د اسراییلو لومړی وزیر بنیامین نتنیاهو چې خپله سیاسي بقا د فلسطیني ماشومانو، ښځو او سپین‌ږیرو په وینو کې لټوي، نور له انسانۍ مرتبې راټیټ شوی، او هغه ته د “انسان” نوم ورکول د انسانیت توهین بلل کېږي.
خو لا ډېر دردناک حقیقت دا دی چې د امریکا اوسنی ولسمشر ډونالډ ټرمپ نه یوازې د دغو جنایتونو په اړه چوپ ناست نه دی، بلکې عملاً د وحشت د سناریو یو مهم شریک ګرځېدلی. په داسې حال کې چې د نړۍ ډېری مشرانو له نتنیاهو سره خپل تماسونه پرې کړي، ټرمپ لا هم د هغه ترڅنګ ولاړ دی، د لیدنو، خنداګانو او ملاتړ له وعدو سره.
ټرمپ نه یوازې د اسراییلو د نظامي جنایاتو په وړاندې چوپ پاتې شوی، بلکې له نتنیاهو سره کتنې او سیاسي ملګرتیا یې ښيي چې دی د همدې نسل‌وژنې یوه مهمه برخه ده. دا لیدنې یوازې تشریفاتي ناستې نه دي؛ دا د ماشوم وژنې، د ودانیو کنډواله کولو، او د یوه ملت د له‌منځه وړلو صراحت‌لرونکې تاییدنامه ده.
نتنیاهو چې نن غزه د اور، وینو او دردونو په لمبو کې لړلې، په ښکاره ډول یې د یوه پیاوړي نړیوال ملاټر پر شا تکیه کړې ده؛ او دا ملاتړی بل څوک نه، بلکې د نړۍ د ځواکمن هېواد ولسمشر ډونالډ ټرمپ دی. همدا د ټرمپ سیاست دی، چې نه یوازې د اسراییلو فاشیستي رژیم ته مشروعیت ورکوي، بلکې د نړۍ نورو فاشیستي تمایلاتو ته هم الهام ورکوي.
د غزې هرې ویجاړې شوې ودانۍ، د هر ماشوم څڼې چې له خاورو را ایستل کېږي، او د هرې بمبار شوې کورنۍ درد، د نتنیاهو تر څنګ د ټرمپ پر غاړه هم دی. دا یو ګډ جنایت دی، او تاریخ به دواړه د انسانیت د شرم په تور کتاب کې ثبت کړي.
اوس وخت رارسېدلی چې نړۍ باید له دې دروغجن، دوه‌مخیه عدالت نه راووځي. هغه ملتونه، مشران او سازمانونه چې ځان د بشري حقونو مدافعین بولي، باید دا ومني چې ټرمپ نور د ازادې نړۍ استازی نه، بلکې د یوه فاشیستي رژیم سیاسي ملاتړی دی.
که نړۍ نن هم چوپ پاتې شي، دا چوپتیا به د سبا د نسلونو شرم وي. د غزې خلک یوازې د نتنیاهو قربانیان نه دي، بلکې د ټرمپ د سیاست، د امریکا د بې‌پروايي، او د نړیوالو د وجدان د مړه کیدو نښې هم دي.
نړۍ باید نور د غندلو له تشو کلمو را ووځي او ددغه دوه جنایتکارانو د روانو وحشتونو مخنیوی وکړي .