د چين د خارجه وزارت وياند ګوه جيا کون د اګست په ۲۷مه نېټه وویل چې له بېجینګ څخه د چين، امريکا او روسيې د ذروي وسلو د کمولو په مذاکراتو د ور ګډېدو غوښتنه نه منطقي ده او نه واقعبینانه ده. هغه ويلي، چين تل د ملي امنيت له اړتيا سره سم خپل ذروي ځواکونه په تر ټولو ټيټې سويې کې ساتلي او ساتي يې او نيت نه لري چې له نورو سره پوځي سيالي وکړي.
وياند ګوه جيا کون دا هم وويل، د چين او امريکا ذروي ځواکونه سره د مقایسې وړ نه دي او د دواړو هېوادونو ذروي تګلارې او پر وړاندې يې ستراتيژيک امنيتي حالت هم بيخي بېل دي، نو له بېجینګ څخه د چين، امريکا او روسيې د ذروي وسلو د کمولو په احتمالي مذاکراتو کې د ور ګډېدو غوښتنه نه يوازې غير معقوله ده، بلکې غیر واقعبینانه ده.
