د تاجکستان ولسمشر امام علي رحمان څو ورځې مخکې د دې هېواد په پلازمېنه دوشنبې کې له چيني رسنيو سره په مرکه کې ويلي، چې د شانګهای همکارۍ سازمان د سيمه ييزو اړيکو د پرمختګ او د امنيت د ساتنې لپاره مهم رول لوبوي. ده زیاته کړې چې دغه سازمان له جوړېدو راهيسې تر اوسه پورې د څو اړخیزې همکارۍ لپاره یو اغیز ناک میکانیزم دی او د امنيت، اقتصاد او کلتور په برخو کې يې فعال رول لوبولی.
تاجکستان د شانګهای همکارۍ سازمان له بنسټ اېښودونکو هېوادونو څخه دی. رحمان ویلي، چې شانګهای همکارۍ سازمان د یو ماشوم په شان دی چې د شپږو بنسټ اېښودونکو غړو له خوا په ګډه ایجاد او روزل شوی دی.
د هغه په خبره، شانګهای همکارۍ سازمان اوس پر يوه مهم نړیوال سازمان بدل شوی دی، چې نه یوازې په سيمه ، بلکې په ګرده نړۍ کې په رسمیت پېژندل شوی دی.
نوموړي ویلي، چې دغه سازمان له جوړېدو راهيسې امنيت په تېره بيا د خپلې حیاتي سیمې منځنۍ اسيا امنيتي مسئلو ته لومړیتوب ورکوي، په مجموع کې شانګهای همکارۍ سازمان د غړيو هېوادونو ترمنځ د اړيکو په پرمختګ او د سيمه ييز امنيت په تضمین کې حیاتي او مهم رول لوبولی دی.
د رحمان په وینا، هېواد يې د شانګهای همکارۍ سازمان د نوبتي رئیسه هېواد په توګه د چين له وړانديزونو څخه ملاتړ کوي، په ځانګړې توګه دا چې په دوشنبې کې د شانګهای همکارۍ سازمان له نشه يي توکو سره د مبارزې مرکز له جوړېدو څخه د چین د فعال ملاتړ قدرداني کوي.
ده وویل: «زه پوره باور لرم چې ياد مرکز به د سیمه ييزې همکارۍ د پياوړتیا او له نشه یي توکو سره د مبارزې په برخه کې د پام وړ برخه واخلي.»
د ۲۰۲۴ کال په جولای کې د چين او تاجکستان مشرانو په ګډه د دواړو هېوادونو اړيکې په نوې زمانه کې هراړخیزو ستراتيژيکو همکاریزو اړيکو ته لوړې اعلان کړې. رحمان دغه راز وویل، دواړه هېوادونه د نوې زمانې لپاره د جامع سټراټژيک مشارکت د پرمختیا په اړه د چین او تاجکستان د ګډې بیانیې په رڼا کې چې د دواړو هېوادونو د رهبرانو له خوا لاسلیک شوې په بېلا بېلو برخو کې د همکاریو کچه لوړه کړي.
ده زیاته کړه چې تاجکستان له هغو لومړنیو هېوادونو څخه دی، چې له چین سره يې د ورېښمو لارې د اقتصادي کمربند د ګډې ابادۍ تفاهم نامه لاسليک کړه. د هغه په خبره، تاجکستان څو کاله راهيسې د چين د پانګونې په ملاتړ د انرژۍ او صنعت په برخو کې ګڼ شمېر بنسټيزې پروژې پلي کړې، د لویو لارې، تونلونه، برېښنايي لېږ خطونه، مهم صنعتي او نورو اساسي بنسټيزې پروژو نه يوازې د تاجکستان ټرانسپورټي شرايط بهتره کړي، بلکې له نړیوالو او سیمه ییزو شبکو سره يې د تاجکستان د صنایعو وصلېدل اسانه کړي دي.
رحمان د شانګهای همکارۍ سازمان د تيان جين سرمشريزې په اړه ویلي، چې دغه غونډه به د غړو ترمنځ د همکارۍ او د دې سازمان د پرمختګ لپاره نوې پاڼه پرانيزي.
