د شانګهای همکارۍ سازمان د غړو هېوادونو د دولتي مشرانو شورا ۲۵مه غونډه د سپتمبر د لومړۍ نېټې په سهار په تيان جين ښار کې تر سره شوه. د چين دولت رئيس شي جين پينګ د دغې غونډې مشري وکړه او مهمه وينا يې وکړه. شي جين پينګ د دغه سازمان د تاسياس د ۲۴کلونو راهيسې يو لړ معلومې لاسته راوړنې او تاريخي برياليتوبونه ياد کړي او د دغه سازمان د ثابت او دايمي پرمختګ لپاره يې پنځه فقره ايز وړانديزونه وکړل.
لومړی: دغه سازمان دې د توپيرونو په موجوديت کې ګډې ګټې ولټوي.
د شانګهای همکارۍ سازمان غړي هېوادونه ټول ملګري دي او بايد يو د بل د نظر درناوی وکړي، ستراتيژيک تماسونه دې وساتي، موافق ټکي دې راټول کړي، يووالی او همکارۍ دې پياوړې کړي، د همکاريو ډګر دې پراخ کړي، د بېلا بېلو هېوادونو ښېګنې دې په سمه توګه ولوبوي او په ګډه دې د دې سيمې د سولې او ثبات، پرمختګ او سمسورتيا مسئوليت پر غاړه ولري.
دويم: دغه سازمان دې د ګډو ګټو پر بنسټ همکارۍ وکړي.
د بېلا بېلو هېوادونو د پرمختګ ستراتيژۍ دې سره یوځای شي، د کمربند او لارې پلان دې په ګډه او باکيفيته توګه اباد شي، د ګډو بحثونو، ګډې ابادۍ او ګډې شراکت په ترڅ کې به د سيمې د پرمختګ انجن پياوړی شي ترڅو خلکو ته لا زياتې ګټې ورسوي.
درېيم: دغه سازمان بايد پر ورخلاصون او شموليت ټينګار وکړي.
د شانګهای همکارۍ سازمان غړي هېوادونه بايد په فرهنګي تبادلو سره دوستي او تفاهم ټينګ کړي، د اقتصادي همکارۍ په ترڅ کې دې يو د بل حمايت وکړي، په ګډه دې د رنګا رنګ تمدنونو په لرلو سره پرمختګ وکړي.
څلورم: دغه سازمان بايد پر عدالت ټينګار وکړي.
د دويمې نړيوالې جګړې سمې نظريې دې پراخې شي، د سړې جګړې نظريې، د ډله ايز مقاومت او بادارۍ کړنې دې له منځه يووړل شي. د ملګرو ملتونو په مرکزيت نړيوال سيستم دې وساتل شي، د سوداګرۍ نړيوال سازمان په مرکزيت دې له څو اړخيز سوداګريز ميکانيزم څخه ملاتړ وشي. مساوي او منظمه څو اړخيزه نړۍ دې جوړه شي او د اقتصاد نړيوال کېدو بهير دې چټک شي او د نړيوالې ادارې لپاره دې لا عادلانه او معقول سيستم جوړ شي.
پنځم: دغه سازمان دې په واقعي توګه پر لوړ موثريت ټينګار وکړي.
د شانګهای همکارۍ سازمان اصلاحاتو ته دې په پرله پسې توګه دوام ورکړل شي، په سرچينو کې دې د پانګونې اندازه زياته شي او د ابادۍ توان دې پياوړی شي، تر څو د دغه سازمان ميکانيزم لا نور بشپړ شي، پريکړې لا نورې علمي شي او عمليات لا نور اغيزمن شي.
