د چین دولت رئیس شي جين پينګ د سپتمبر په لومړۍ نېټه د شانګهای همکارۍ سازمان په سرمشریزه کې د نړۍ د مدیریت لپاره ابتکاري وړاندیز وکړ. د ګردې نړۍ د پرمختګ، امنیت او تمدن ساتلو لپاره د چین له خوا درېیو نړیوالو وړاندیزونو وروسته، دا یوه بله سیستماټیکه طرحه ده چې چین د بشریت پروړاندې د مشترکو ننګونو د لرې کولو لپاره وړاندې کړې ده.
په داسې حال کې چې نړيوال حالت له سختو بدلونونو سره مخ دی او د نړیوالې ادارې پر وړاندې ډېرې ستونزې موجودې دي، دا وړاندیز د نړیوال مدیریت لپاره د عادلانه او مساوي سیسټم د قایمېدو لپاره لوری په ګوته کړی دی.
سږ کال د فاشیزم ضد نړیوالې جګړې د بري ۸۰ مه کلیزه ده، او د تاریخ یادونې او په ګډه د راتلونکي د جوړولو مهمه شېبه ده. اوسمهال نړیوال وضعیت ترینګلی دی او نړۍ له څلورلارې سره مخ شوې ده. یوه خوا، د نویو اقتصادونو او پرمختیايي هېوادونو په استازیتوب سراسري جنوب مخ پر وده کېدو دی او د نړۍ د مدیریت لپاره یې خپل خدمتونه کړي چې په نړۍ کې د ستر بدلون څرګنده نښه ده. بله خوا، د سړې جګړې نظریې او تسلط غوښتنې لا هم موجودې دي چې له امله يې نوې ننګونې مخ په زیاتېدو دي. خو د ګردې نړۍ د مدیریت اوسنی سیسټم له دغو ستونزو او ننګونو سره د مقابلې توان نه لري، د مقرراتو وضع کېدو حقونه لا هم د محدودو هېوادونو لخوا انحصار شوي دي، پرمختیايي هېوادونه له اوږدې مودې راهیسې محروم ساتل شوي دي.
د ګردې نړۍ د مدیریت وړاندیز چې د شي جين پينګ لخوا وړاندې شوی، د نړۍ د مدیریت په اوسني سیسټم کې د نابرابرو حقونو، د ارزښتونو د ناسمې پېژندنې او د عمل د کمښت په شمول د شته ستونزو د حلولو لپاره رغنده رول لوبولای شي. په دغه وړاندیز کې پنځه اصول په ډاګه شوي چې باید د ټولو هېوادونو حاکمیت ته په مساوي سترګه وکتل شي، د نړیوالو قوانينو مراعات دې وشي، څواړخیزم دې تطبیق شي، پر خلکو دې تمرکز شي او لارښوونکي عملونه دې ترسره شي، چې په نړیوالې ادارې کې د مختلفو هېوادونو د مساوي ګډون، پرېکړې او ګټو ته لاسرسي لپاره یې روښانه طریقه وړاندې کړې ده.
چین نه یوازې د نړۍ د مدیریت لپاره د طرحې وړاندې کوونکی دی، بلکې د دې وړاندیز تطبیق کوونکی هم دی. شي جين پينګ د شانګهای همکارۍ سازمان په سرمشریزه کې اعلان وکړ چې د چین او د شانګهای همکارۍ سازمان ترمنځ د انرژۍ، زرغون چارو او ډیجيټلي اقتصاد په برخو کې درې همکاریز ډګرونه او د تخنیکي نوښت، لوړو زده کړو او د مسلکي ښوونې په ساحو کې به درې همکاریز مرکزونه جوړ شي. ده وویل چې د دغو همکاریزو میکانیزمونو پر مټ به نه یوازې د مختلفو هېوادونو ترمنځ د ټکنالوژۍ شراکت وهڅول شي، بلکې د لمر او باد په شمول به د نورې پاکې انرژۍ د پروژو په وسیله د پرمختیايي هېوادونو د انرژۍ له پرمختګ سره مرستې وشي.
برسیره پر دې، چین ژمنه کړې چې په راتلونکو ۵ کلونو کې به د شانګهای همکارۍ سازمان په غړو هېوادونو کې د سترګو د درملنې پنځه زره عملیات او د لس زرو تنو لپاره د سرطان د تشخیص کارونه ترسره کړي. چین به دغه راز د خلک محوره نړیوال مدیریت نظریې عملي کړي.
د نړۍ د مدیریت وړاندیز د یواړخیزم او ناسمې سیالۍ پر ځای، پر ګډې همکارۍ او ګډ پرمختګ تمرکز کويي. چین پر شانګهای همکارۍ سازمان غږ کوي چې د دې وړاندیز د تطبیق لارښوونکي رول ولوبوي. چین د شانګهای همکارۍ سازمان او بریکس په شمول د څواړخیزو همکاریزو ميکانيزمونو په ملتیا له مختلفو هېوادونو سره د نړۍ د مدیریت د عادلانه سیسټم جوړونه هڅوي او د بشریت د ګډ برخلیک ټولنې د جوړولو لپاره اوږه په اوږه کوښښونه کوي څو د نړۍ روښاڼه راتلونکی اباد کړي.
