د چين دولت رئیس شي جین پینګ د سپتمبر په دويمه په بېجينګ کې د ترکمنستان او ایران له ولسمشرانو او د ماليزیا له صدراعظم سره وکتل.
د ترکمنستان او ایران ولسمشران او د مالیزيا صدراعظم د شانګهای همکارۍ سازمان په سږنۍ سرمشریزه کې او همدارنګه د جاپان د تېري پرضد د چینايانو د مقاومت جګړې او د فاشیزم ضد نړيوالې جګړې د برياليتوب د ۸۰ مې کلیزې د يادونې په فعاليتونو کې د ګډون لپاره چين ته راغلي دي.
شي جين پینګ د ترکمنستان له ولسمشر سردار بردي محمدوف سره د کتنې پر مهال دواړه هېوادونه یو د بل د باور وړ او ښه همکاران بللي او ويلي يې دي، چې دواړه هېوادونه د متقابل درناوي او ګډو ګټو پر اساس همکارۍ کوي او چين غواړي چې له ترکمنستان سره خپلمنځي همکارۍ او اړيکې ژورې کړي او د دواړو هېوادونو د ګډ برخليک ټولنه جوړه کړي.
سردار بردي محمدوف هم په دې ليدنه کې وويل، چې ترکمنستان غواړي له چین سره په بېلابېلو برخو کې خپلمنځي همکارۍ او راشې درشې پیاوړې کړي او خپلمنځي اړيکو ته لازياته وده ورکړي. نوموړي وويل، د انسانانو د ګډ برخليک ټولنې د ابادۍ مفکوره او د نړۍ د مديريت په اړه ابتکاري وړانديز چې د رئيس شي جین پينګ لخوا وړاندې شوی، د نړيوالو اړيکو د سیسټم د اصلاح لپاره ګټور دی او هېواد يې ورڅخه پوره ملاتړ کوي او د عملي کولو لپاره به يې هڅې وکړي.
شي جين پینګ د ایران له ولسمشر مسعود بزشکيان سره د کتنې پر مهال وويل چې چين به له ایران سره ګډ کوښښ وکړي، چې خپلمنځي هراړخيزو ستراتېژیکو همکاریزو اړيکو ته ثابت او دايمي پرمختګ ورکړي. نوموړي وويل، چين به د ایران په ګډون له نړيوالې ټولنې سره د نړۍ د لاعادلانه او معقول مديريت سیسټم د جوړولو لپاره ګډ کار وکړي او دغه راز د ایران د ذروي مسئلې د يوې داسې حللارې د لټولو لپاره به خپلو هڅو ته دوام ورکړي، چې د بېلابېلو خواوو معقولې غوښتنې پکې په پام کې ونيول شي.
پزشکيان وويل، چې ایران له چین سره اړيکو ته په ډېره درنه سترګه ګوري. د رئیس شي جين پینګ لخوا د نړۍ د مديريت لپاره ابتکاري وړانديز د نړيوال نظم د لاعادلانه او معقول کېدو لپاره مهم ارزښت لري او هېواد يې ورڅخه پوره ملاتړ کوي.
شي جين پينګ دغه راز د ماليزيا له صدراعظم انور ابراهيم سره د کتنې پر مهال وويل، چې چين غواړي له مالیزيا سره ګډه هڅه وکړي چې د دواړو هېوادونو د ګډ برخليک ټولنه اباده کړي، د دواړو هېوادونو خلکو ته زياتې ګټې ورسوي او د نړيوالې سولې او ودې لپاره خدمتونه وکړي.
انور ابراهيم هم وويل، چې د رئيس شي جین پینګ لخوا تازه وړاندې شوی د نړۍ د مديريت ابتکاري وړانديز د ستونزو د هواري لپاره ځانګړی ارزښت لري او پکې يې غوره مفکوره او هم د ستونزو عملي حللاره شامله ده، نو ځکه دا نوښت د نړۍ د مديريت چارو د ښه کولو لپاره خورا ستر اهميت لري. ده ويلي چې ماليزيا له چين سره ځانګړو ستراتېژیکو همکاريزو اړيکو ته ارزښت ورکوي او غواړي چې له چین سره د بېلابېلو برخو همکارۍ پياوړې کړي، څو د دواړو هېوادونو خلکو ته زياتې ګټې ورسيږي.
