د جاپان د تېري ضد د چينايانو د مقاومت جګړې او د فاشيزم ضد نړيوالې جګړې د بريالیتوب د اتيايمې کاليزې يادغونډه د سپتمبر د درېيمې نېټې په سهار په بېجينګ کې په تيان ان من ميدان کې په درنو مراسمو سره پيل شوه.
د چين کمونېست ګوند د مرکزي کمېټې عمومي منشي، د دولت رئيس او مرکزي پوځي کمېټې مشر شي جين پينګ پکې يوه مهمه وينا وکړه.
هغه وويل چې نن ورځ په درنو مراسمو سره د جاپان د تېري ضد د چينايانو د مقاومت جګړې او د فاشيزم ضد نړيوالې جګړې د بريالیتوب د اتيايمې کاليزې يادغونډه پيلوو څو چې تاريخ دې هير نه کړو، سرښندونکو ته درناوی وکړو، سوله په مينه وساتو او لا روښانه راتلونکی برابر کړو.
ده زیاته کړه: زه د چين کمونېست ګوند د مرکزي کمېټې، د چين د ملي ولسي کانګرس، دولتي شورا، د ولسي سياسي مشورتي کنفرانس ملي کمېټې او مرکزي پوځي کمېټې په استازيتوب د جاپان د تېري ضد په جګړې کې متقاعدو عسکرو او کادرونو، وطن پالونکو، د جاپان د تېري ضد پوځي افسرانو او جنرالانو او هغو کورنيو او بهر ميشتو چينايانو ته احترام او درناوی کوم چې د جاپان د تېري ضد د چينايانو د مقاومت جګړې د برياليتوب لپاره يې ستر خدمتونه کړي وو. هغه وویل، له هغو بهرنيو حکومتونو او نړيوالو دوستانو څخه مننه کوم چې په ياده جګړه کې يې د چين له خلکو سره مرستې کړې وې او له بېلا بېلو هېوادونو د راغلو مېلمنو هرکلی کوم چې په دا ياغونډه کې ګډون کوي.
