د چين دولت رئيس شي جين پينګ د سپتمبر په ۳مه نېټه په بېجينګ کې د خلکو په لوی تالار کې د اندونيزيا له ولسمشر پرابوو سوبيانتو سره وکتل.
پرابوو په همدې ورځ د جاپان د تېري پر ضد د چيايانو د مقاومت جګړې او د فاشيزم ضد نړيوالې جګړې د اتيايمې کليزې په يادغونډه کې ګډون کړی و.
شي جين پينګ په دې کتنه کې وويل، دا چې ولسمشر پرابوو له ډېرو مصروفتونو سره سره چين ته راغلی او په يادغونډه کې ګډون کړی، دا له چین سره اړيکو ته د ده له خوا په درنه سترګه کتل او له چينايانو سره د اندونيزيانو د صميميت او دوستۍ ښودنه کوي.
شي جين پينګ دغه راز وويل، چې چين د پرابوو د حکومتوالۍ، د اندونیزيا د نظام او ثبات له تامین او د دغه هېواد له پرمختګ څخه ملاتړ کوي. چين هيله لري، چې له اندونيزيا سره په سوله کې د ګډ ژوند پر پنځو اصولو او باندونګ روحيې ټينګار وکړي، په لوړه کچه د دواړو هېوادونو د ګډ برخليک ټولنې ابادۍ ته وده ورکړي او د انسانانو د پرمختګ لپاره خدمتونه وکړي.
شي جين پينګ پر دې ټينګار وکړ، چې چين او اندونيزيا لوی پرمختيايي هېوادونه دي او بايد له يو اړخيزتوب او د بادارۍ غوښتونکو کړنو سره د مبارزې په برخه کې یو له بل سره همکاري وکړي او په ګډه دې سيمه ييزه سوله او ثبات او په نړۍ کې عدالت او برابري تامین کړي.
