په چين کې د سپتمبر ۱۰مه نېټه د ښوونکو له ورځې سره برابره ده. د چين دولت رئيس شي جين پينګ د سپتمبر په ۹مه نېټه د دې ورځې د رارسېدو په درشل کې پر ځانګړو دندو د ګمارل شويو ښوونکو استازو ته ځوابي پيغام وليږه او د دغې ورځې په مناسبت يې د دغه هېواد ټولو ښوونکو او تعليمي سکټور کارکوونکو ته مبارکي او نيکې هيلې وړاندې کړې.
شي جين پينګ پر دې ټينګار وکړ، چې تعليم د يوه هېواد مهمه چاره ده او ښوونکي په دې چاره کې بنسټيز رول لوبوي. شي جين پينګ له ښوونکو او تعليمي کارکوونکو څخه غوښتنه وکړه، چې د ښوونې پر اصلي موخې ټينګار وکړي، تعليمي توان او مهارت لا لوړ کړي، د ماشومانو د سالم پرمختګ لارښوونکی رول ولوبوي، د سوسياليزم ابادوونکي وروزي او د کليو د سمسورتيا او د غښتلي تعليمي هېواد د ابادۍ لپاره نوي خدمتونه وکړي.
په چين کې د کليو د اجباري ښوونې لپاره د ځانګړو تعليمي دندو پلان ټاکل شوی او له مخې يې له پوهنتونو فارغ شويو محصلينو ته د مرکزي او لويديځو کليوالو سيمو په ښوونځيو کې د ښوونکو د دندو بلنه ورکوي. په ۲۰۰۶م کال د دغه پلان له تطبيق راهيسې يو ميليون او يو سل اتيا زره فارغ شوي محصلين پر دغو ځانګړو تعليمي دندو ګمارل شوي او د ښوونکو په توګه د دغه هېواد د دوه وېشتو ولايتونو د زرو ولسواليو په څه باندې دېرشو زرو ښوونځيو کې کار کړی. په دې وروستيو کې د دغو ښوونکو ۸ استازو، چې د غښتلو ښوونکو جايزې يې تر لاسه کړې، رئيس شي جين پينګ ته پيغام وليږه او د کليوالو سيمو د تعليمي دندو د وضعيت او احساساتو په اړه يې معلومات وړاندې کړل.
