جوزف ووټل: له افغانستان د ځواکونو وتلو ته شرایط نه دي برابر

امریکايي جنرال جوزف ووټل وايي، ولسمشر غني سره له دې چې په ښکاره یې د امریکا او طالبانو ترمنځ پر خبرو اندېښنه ښودلې، د هغو ملاتړ کوي. ووټل د امریکا د سنا جرګې د وسله والو خدماتي کمېټې ته ویلي، چې له زلمي خلیل‌زاد سره له خپلو خبرو ورته څرګنده شوې چې له ولسمشر غني سره په منظم ډول مشورې کوي، بشپړ معلومات ورکوي او په حقیقت کې دا خبرې د ولسمشر غني په ملاتړ پیل شوي او هغه ترې خبر دی. ده له افغانستانه د امریکايي ځواکونو د وتلو په اړه ویلي چې په افغانستان کې سیاسي شرایط اوس داسې نه ‌دي چې امریکايي پوځیان له دې هېواده ووځي.