د برېکس هېوادونو سرمشریزه غونډه د سپتمبر په ۸مه نېټه په انلاین ډول تر سره شوه. نړیواله ټولنه د دې سرمشریزې په اړه مثبت نظر لري.
دوی پر دې باور دي چې د چین د دولت رئیس شي جين پينګ وړانديزونه د برېکس هېوادونو لپاره مهمې لارښوونې برابروي څو په ګډه ننګونې حل کړي او يووالی او همکاري پياوړې کړي او دا به له پروټېکشنيزم سره د مقابلې لپاره د سراسري جنوب هېوادونو د توان د پياوړتيا لپاره ګټور وي.
اوس په نړۍ کې تسلط، يواړخيزم او پروټېکشنيزم لا سخت شوی. د دې حالت پر وړاندې، د چين د دولت رئیس شي جين پينګ په سرمشريزه کې د بريکس پراخې همکارۍ د پياوړتیا او په ګډه د انسانانو د ګډ برخلیک ټولنې د جوړولو لپاره درې لاندې وړانديزونه وړاندې کړل.
لومړی دا چې موږ باید څو اړخيزم او نړيوال عدالت وساتو، دویم دا چې موږ باید د ګډو ګټو پر بنسټ پر خلاصون ټینګار وکړو او د نړيوال اقتصادي او سوداګريز نظم ساتنه وکړو او درېیم دا چې موږ باید د ګډ پرمختګ لپاره یووالی او همکاري وکړو.
په سرمشريزه کې ګډون کوونکو مشرانو ویلي، د برېکس هېوادونه باید يووالی او همکاري پياوړې کړي او په ګډه له بحرانونو او ننګونو سره مقابله وکړي. د دوی په اند، د رئیس شي جین پینګ له خوا د نړۍ د مدیریت لپاره ابتکاري وړاندیز د نړیوال نظم د ښه والي لپاره لاره په ګوته کوي.
څو اړخیزم د سولې او پرمختګ لپاره یو مهم بنسټ دی. د برېکس هېوادونه د یو اړخیزم او تسلط غوښتنې پر وړاندې مسوولیت لري چې د ملګرو ملتونو په مرکزیت د نړیوال سیسټم او د نړیوال قانون پر بنسټ د نړیوال نظم د ساتلو لپاره ګډ کوښښ وکړي. چین د نړۍ د ترټولو لوی پرمختیايي هېواد په توګه تل د څو اړخیزم کلک مدافع پاتې شوی دی. رئیس شي په دې وروستیو کې د نړۍ د مدیریت لپاره ابتکاري وړاندیز وکړ او د نړۍ د مديريت د لاعادلانه او معقول سيسټم د جوړولو او د نړیوال عدالت د ساتلو لپاره يې تازه لایحه برابر کړې ده.
اوس مهال، د برېکس هېوادونو نفوس د نړۍ نږدې نیمایي برخه نیسي، عمومي اقتصاد يې د نړۍ شاوخوا ۳۰ سلنه نیسي او عمومي سوداګریز ارزښت يې د نړۍ یو پر پنځمه برخه جوړوي. د برازیل « فورم» مجلې اشاره وکړه چې په ۲۰۲۴ کال کې د برېکس هېوادونو د نړیوالې اقتصادي ودې مشري وکړه.
د دې هڅو په لړ کې، چین د نړۍ دوهم لوی اقتصاد په توګه د لوړې کچې پرانیستلو ته دوام ورکوي او غواړي چې په واقعي توګه د برېکس له غړو هېوادونو سره فرصتونه او ګټې شریکې کړي ترڅو ګډې ګټې ومومي.
د نږدې له ۲۰ کاله پرمختګ وروسته، د برېکس هېوادونو ترمنځ همکاري په تدریجي ډول نوي دور ته داخله شوې ده. چین هیله لري چې په راتلونکي کې د ګډ پرمختګ لپاره د برېکس له نورو غړو هېوادونو سره یووالي او همکارۍ ته دوام ورکړي. همدارنګه په ګډه د نړیوال پرمختګ وړاندیز پلي کولو او د کمربند او لارې د لوړ کیفیت جوړونې ته وده ورکړي. دا پدې مانا ده چې په راتلونکي کې، د بریکس غړو هېوادونو ترمنځ په اقتصاد، سوداګرۍ، مالي چارو، ساینس او ټېکنالوژۍ په برخو کې همکارۍ لا ډېرې ګټورې پایلې ورکړي.
د برېکس هېوادونه به په راتلونکي کې خپل مسؤلیتونه پر غاړه واخلي، یو له بل څخه به ملاتړ وکړي او په ګډه به د نړۍ دمدیریت لپاره د شي جین پينګ وړاندیز پلی کړي. دوی به خامخا د نړیوالو بدلونونو له ازموینې سره مخ شي او په دوامداره توګه به د سوله ییز برېکس، نوښتګر برېکس، زرغون برېکس، عادلانه برېکس او د خلکو پر غوښتنو متمرکز برېکس اهدافو ته پرمختګ وکړي چې د نړیوالې سولې او پرمختګ لپاره لوی “بریکس ځواک” برابر کړي.
