د ۲۰۲۵م کال د چین د خدماتي سوداګرۍ نړیوال نندارتون د سپټمبر له ۱۰مې نیټې تر ۱۴مې نېټې په بېجینګ کې تر سره شو.
په سږني نندارتون کې نه یوازې د استرالیا، جرمني او د پوهنې ملکیت نړیوال سازمان په شمول ۸۵ هېوادونو او نړیوالو سازمانونو د نندارې غرفې ځای پر ځای کړې، نږدې دوه زرو شرکتونو هم پکې برخه واخیستله او په دې حجم کې د والمرټ او استرازینکا په شمول شاوخوا ۵۰۰ هغه تصدۍ شاملې دي چې په نړۍ کې مخکښ ځایونه لري.
په سږني نندارتون کې د مصنوعي ځیرکتیا ټکنالوژۍ ډېرې د پاملرنې وړ دي. د ډېرو ګډونوالو تصدیو استازو ویلي، د خدماتي سوداګرۍ د ډیجټل کېدو او ځیرکتیا کېدو په برخو کې د چین لاسته راوړنې ډېرې د لیدو وړ دي.
د لوړې ټکنالوژۍ ځینې نوي پرمختګونه او خدمات په سږني نندارتون کې نندارچیانو ته وړاندې شول. د بېلګې په توګه، بهرنیان په لومړي ځل چین ته سفر کوي، دوی د ګرځنده ټيلېفونونو سیم کارټونه، د اپلیکېشن ډاونلوډ او د خپل بانکي حساب د کارونې په شمول له زیاتو ستونزو سره مخ کېږي . د چین بانک په سږني نندارتون کې د دغو ستونزو د لرې کولو په موخه د بهرنیانو لپاره یو لړ نوښتي خدمتونه وړاندې کړل. مثلا د (مي فانګ که) په نوم سیم کارډ چې د پیسو ورکړې، مخابراتي او ترانسپورتي خدمت کولای شي او په موبایلفون کې تر اچول کېدو وروسته سمدلاسه کارول کېږي. برسیره پر دې، بل اپلېکشن چې (لای هوا تونګ) نومېږی، د بهرنیانو لپاره د نقشې لارښوونې، د ډوډۍ، ټیکټ او هوټل د سپارښتنې په شمول خدمتونه وړاندې کولای شي.
اوس د چین د خدماتي سوداګرۍ د باکیفیته پرمختګ نوې مرحلې ته رسېدلی دی او په دې جریان کې د ډیجټل ټکنالوژۍ د خدماتي سوداګرۍ په پرمختګ کې نوی هڅوونکی رول لرلی دی.
د سږني نندارتون په ترڅ کې د خدماتي سوداګرۍ د پرمختګ په فورم کې د ډیجټلي تجارت د پرمختګ او همکارۍ د ۲۰۲۵ کال راپور خپور شو او له مخې یې، تېر کال د چین د ډیجټلي سوداګرۍ اندازه ۳۸۵ میلیارډه، ۷۶۰ میلیونو ډالرو ته رسېدلې، دغه شمېر د ۲۰۲۳ کال په نسبت ۵ اعشاریه ۲ سلنه زیاتوالی ښيي. ډیجټلي سوداګرۍ د خدماتي سوداګرۍ ۳۶ اعشاریه ۷ سلنه برخه نیولې، د ۲۰۱۹ په پرټله ۸ اعشاریه ۲ سلنه زیاتوالی ښيي.
په دې سره چې د خدماتي سوداګرۍ د ګردې نړۍ د اقتصاد او تجارت د زیاتېدو نوی انجن ګرځېدلی، نو ویلی شوو چې چین د ډیجټلي ټکنالوژۍ پر مټ نوښتونه رامنځته کوي، د ورخلاصون او همکارۍ له لارې له نورو سره ګټور فرصتونه شریکوي او په پر له پسې ډول د ګردې نړۍ د اقتصاد د سمسورتیا لپاره خوځنده ځواک برابروي.
په چین کې د نړیوال بانک د دفتر مشره اقتصاد پوه میلیسا وویل، چین په ډیجیټلي نوښتونو کې د نړیوالې مشرۍ بیلګه ده، د چین د خدماتي سوداګرۍ زیاتوالی په تیرو ۱۵ کلونو کې څرګند زیاتوالی موندلی او مهم اقتصادي انجن ګڼل کېږي.
د اسیا پراختیايي بانک مشر اقتصاد پوه پارک وېټسوکر باور وښود چې خدماتي سوداګري د چین په اقتصادي پراختیا کې ډېرې مهمې دندې ترسره کوي او د هېواد د نوښت او تولیدي وړتیا د زیاتوالي اصلي سرچینه ګڼل کېږي. د آسیا-پیسفیک سیمې او حتی په نړیواله کچه د خدماتي سوداګرۍ او سرمایې ګذارۍ ژورولو په برخه کې د چین رول مخ په زیاتېدو دی.
