د چین د بهرنیو چارو وزارت ویاند لین جیان د سپتمبر په ۱۵مه نېټه په یوه مطبوعاتي غونډه کې د جنوبي سمندرګي د وروستي وضعیت په اړه پوښتنو ته ځوابونه ورکړل.
لین جیان وویل چې چین په تېره اوونۍ کې د اړوندې موضوع په اړه خپل دریځ روښانه کړ .
ده وویل: موږ د امریکا د غلطو څرګندونو په اړه جدي احتجاج وکړ او هوانګ یان ټاپو د چین د خاورې یوه برخه ده، په دې ټاپو کې د چین د دولت په کچه د طبیعي چاپېریال ساتنې سیمې جوړول پوره مشروع او معقول کار دی.
ده زیاته کړه چې اوس د چین او اسیان هېوادونو د ګډو هڅو له امله د جنوبي سمندرګي وضعیت باثباته دی. هغه وايي چې امریکا د جنوبي سمندرګي د مسئلې هېڅ یو اړخ نه دی، خو بیا هم دغه هېواد په مکرر ډول غیر مسؤلانه څرګندونې کوي او د شخړې راپاړولو لپاره نور هېوادونه لمسوي.
نوموړی وايي چې چین له امریکا څخه غوښتنه کوي چې ژر تر ژره د جنوبي سمندرګي په چارو کې لاسوهنه بنده کړي تر څو په دغه سیمه کې سوله او امن راشي.
