د چين صدراعظم لي چيانګ پر ځايي وخت د سپتمبر په ۲۵مه نېټه په نيويارک کې له دوستو امریکايي شخصیتونو سره يوه ناسته جوړه کړه. د امريکا او چين د سوداګرۍ ملي کمېټې، د امريکا او چين اړيکو ملي کمېټې، د امريکا سوداګرۍ خونې، د امريکا د بهرنيو اړيکو کمېټې استازيو، کارپوهانو او د تصديو مسؤلينو پکې ګډون کړی دی.
د چين صدراعظم لي چيانګ د چين او امريکا اړيکې په نړۍ کې تر ټولو مهمې دوه اړخيزې اړيکې بللې او ويلي يې دي، دواړه هېوادونه بايد يو د بل ملګري او همکاران وګرځي چې دا تر سره کېدای شي.
هغه وويل، چين وړتيا لري چې د خپل اقتصاد ثابت او سالم پرمختګ يې ساتلی دی.
ده ویلي: لومړی، چين به تل رغنده او مسؤلانه رويه غوره کړي او له امريکايي لوري سره به د مساواتو، درناوي او ګډو ګټو پر بنسټ خپلمنځي سوداګريزې اړيکې پرمخ بوزي. دوهم، چين به تل پر پرمختيايي چارو تمرکز وکړي او خپلو اقتصادي چارو ته به ثابت پرمختګ ورکړي. درېيم، چين به خپلې ژمنې پوره کړي، پر ورخلاصون به ټينګار ولري څو بهرنۍ تصدۍ په چين کې خپلې چارې پراخې کړي.
برخه والو دوستو امريکايي شخصيتونو هيله وښودله چې د امريکا او چين لوړ پوړي چارواکي يو له بل سره تګ راتګ وساتي او د دواړو هېوادونو اړيکې ثابتې کړي. دوی وویل چې امريکايي تصدۍ د چين پر اقتصادي پرمختګ باور لري او په چين کې به خپلې پانګې پراخې کړي.
