د چين صدراعظم لي چيانګ د سپتمبر په ۲۶مه نېټه د ملګرو ملتونو په مقر نیویارک کې د یاد سازمان د ۸۰مې عمومي اسامبلې په عادي مباحثه کې ګډون او ورته يې وينا کړې.
نوموړي په خپله وينا کې ويلي، چې سږکال د فاشيزم ضد د نړيوالې جګړې د برياليتوب ۸۰مه کليزه او د ملګرو ملتونو د جوړېدو له ۸۰مې کلیزې سره برابر دی. تاريخ ته په کتو، سوله او پرمختګ د بېلابېلو هېوادونو ګډه هيله ده، يووالی او همکارۍ د انسانانو د پرمختګ لپاره تر ټولو غښتلی محرک ځواک دی، عدالت او انصاف د نړيوالې ټولنې لپاره تر ټولو مهمه غوښتنه ده.
لي چيانګ زياته کړې، چې چين د ملګرو ملتونو بنسټ ايښودونکی غړی هېواد دی او تل د انسانانو د ګټو د زياتوالي په پار په نړيوالو چارو کې فعاله برخه لري. د چين دولت رئیس شي جين پينګ په دې وروستيو کلونو کې د انسانانو د ګډ برخليک ټولنه او د نړيوال پرمختګ، امنيت، تمدن او ادارې وړانديزونه وړاندې کړي، چې د نړيوالو ستونزو د حل لپاره يې د چين پلانونه برابر کړي. د هغه په وينا، هېواد يې غواړي له بېلابېلو خواوو سره د عملياتو له لارې لا نورې زياتې واقعي مسئلې حل کړي، څو د نړۍ سولې او پرمختګ ته وده ورکړي.
