د امريکا د بهرنيو چارو وزارت مرستيالې الېس وېلز ويلي، پاکستان د دې وړتيا لري چې طالبان د سولې خبرو اترو ته چمتو کړي.
نوموړې دغه څرګندونې په نيويارک کې د ملګرو ملتونو د کلنۍ غونډې په څنډه کې خبريالانو ته کړې او ويلي يې دي چې د افغانستان د سولې او ثبات لپاره به له پاکستان سره په ګډه کار کوي.
هغې زياته کړې چې پاکستان د سولې مېز او خبرو اترو ته د طالبانو په راوستو کې ځانګړى صلاحيت لري او په دې برخه کې يې د مرستې ډاډ ورکړى دى.
نوموړې د دې پوښتنې په ځواب کې چې د طالبانو او امريکا نېغ په نېغه خبرو کې پاکستان څه رول ترسره کړى؟ له څه ويلو ډډه وکړه خو ويې ويل چې د پاکستان اوسني حکومت د افغان حکومت او طالبانو ترمنځ د سولې خبرو کې همکارۍ ته چمتووالى ښودلى دى.
د هغې په وينا، امريکا يوازې د افغان سولې پروسه کې مرسته کوي، نېغ په نېغه خبرې اترې بايد د افغان حکومت او طالبانو ترمنځ وشي.
بلخوا د پاکستان د بهرنيو چارو وزير شاه محمد قريشي ويلي چې هېواد يې د خپلو ملي ګټو لپاره پخوا له افغان طالبانو ملاتړ کاوه.
قريشي چې د ملګرو ملتونو په کلنۍ غونډه کې د ګډون لپاره امريکا ته تللى، دغه څرګندونې يې هلته له الجزيرې ټلويزيون سره په يوه ځانګړې مرکه کې کړې دي.
هغه پر امريکا نيوکې کړې او ويلي یې دي چې دغه هېواد اوس په دې سيمه کې د نويو ملګرو د موندلو په هڅو کې دى، خو زياته کړې یې ده چې پاکستان هم نوي ملګري پيدا کولى شي.
