د سالنګ له لارې کابل ته د تېلو لېږد پیل شو

د ټولګټو چارو وزارت د تخنیکي مرستیال په مشرۍ د بې کیفیته تېلو مخنیوي پلاوي د سالنګ لویې لارې د بیارغونې له چارو تر کتنې او له اړونده مسوولینو سره تر خبرو وروسته پرېکړه کړې، چې له شمال څخه به هغو لس ټایره ټانکرو ته چې د نفتو او ګازو د دولتي شرکت د حیرتان او اقینې بندرونو له مدیریتونو معرفي شوي، کابل ته د تېلو د لېږد اجازه ولري. د افغان حکومت مرستیال ویاند حمدالله فطرت ویلي، چې دغه پرېکړې به سر له ننه عملي شي او په دې سره به کابل او سویلي ولایتونو کې د تېلو بیې راټیټې او د سړک د رغونې چارې خوندي شي. فطرت ویلي؛ هغه خالي ټانکر چې له کابل څخه ستنېږي، بدیله لار به کاروي.