په ۱۹۹۵م کال کې د ښځو څلورمه نړيواله غونډه د چين په پلازمېنې بېجينګ کې ترسره شوه او ((د بېجينګ اعلاميه)) او ((عملياتي مرامنامه)) پکې تصويب شوې، چې له مخې یې د جنسياتي برابرۍ او د ښځو د پرمختګ نقشه وټاکل شوه او همدا اعلاميه او مرامنامه د ښځو چارو د پرمختګ لارښوونکي سندونه وګرځېدل.
تر يادې غونډې دېرش کاله وروسته يو ځل بيا د ښځو دوه ورځنۍ نړيواله سرمشريزه د اکتوبر په ۱۳مې نېټې په پلازمېنې بېجينګ کې پيل کېږي چې د جنسياتي برابرۍ او د ښځو پر هر اړخيز پرمختګ تمرکز لري او د نړۍ د ښځو زیاتې هيلې يې راټوکولې دي.
د ملګرو ملتونو څو چارواکو او کارپوهانو رسنيو ته ويلي، چې چين له دريو لسیزو راپدېخوا د ښځو د څلورمې نړيوالې غونډې روحيه پلې کوي او په کور دننه یې د ښځو د چارو د لاسته راوړنو لپاره ډېرې هڅې کړي او له ملګرو ملتونو سره يو ځای يې د ښځو له چارو څخه ملاتړ کړی دی. دوی تمه ښودلې، چې د سږنۍ غونډې ګډونوال به ګډو نظريو ته ورسېږي او د ښځو د نړيوالو چارو د پر له پسې پرمختګ لپاره به هڅې وکړي.
((د بېجينګ اعلاميه)) د ګډونوالو د يووالي او ځيرکتيا ښکارندويي کوي
د ۲۰۲۴م کال د اکتوبر په نهمه نېټه د ملګرو ملتونو د بشري حقونو شورا په ۵۷مې غونډې کې د بېلا بېلو هېوادونو استازي راټول شول او ((د بېجينګ اعلاميه )) او (( عملياتي مرامنامه)) د تصويبېدو د دېرشمې کاليزې د يادونې هغه پرېکړه ليک يې تصويب کړ، چې د چين په شمول د څه باندې ۱۱۰ هېوادونو د استازو له خوا وړاندې شوی و.
په وروستيو کلونو کې د ملګرو ملتونو د بشري حقونو شورا د سياسي کېدو او افراطيت فضا مخ په سختېدو ده، خو اوس بېلا بېل هېوادونه ((د بېجينګ اعلاميې )) د روحيې په هکله ګډو نظريو ته رسېدلي دي.
د ملګرو ملتونو څو چارواکو ويلي، چې ياد پرېکړه ليک نه يوازې د مختلفو هېوادونو (( د بېجينګ اعلامیه)) او (( عملياتي مرامنامه )) د کليدي افکارو د ګډو نظريو، بلکې د يووالي او د زمانې د ارزښت ښکارندويي هم کوي.
د ملګرو ملتونو د بشري حقونو چارو لوړ پوړې کميشنرې تورک رسنيو ته ويلي، چې دېرش کاله مخکې په بېجينګ کې د ښځو په نړيوالې غونډې کې ((د بېجينګ اعلاميه )) او ((عملياتي مرامنامه )) تصويب شوې او د ښځو د حقونو او جنسيتي برابرۍ په تاريخ کې يې څلی ودراوه او هم يې د ټولو غړو يووالی او ځيرکتيا ښکاره کړه.
د ملګرو ملتونو د عمومي منشي مرستيالې او د دې سازمان د ښځو ادارې اجرائيوي مسؤلې سيما باهوس ياد سندونه ((د بېجينګ اعلاميه )) او ((عملياتي مرامنامه )) نه يوازې د غړيو هېوادونو ژمنه، بلکې عملياتي نقشه هم بللې ده او په خبره یې، له درو لسیزو راهيسې ډېری هېوادونه پوه شوي، چې جنسياتي برابري د ټولنيز پرمختګ لازمه غوښتنه ده.
چين د ښځو چارو د پرمختګ په برخه کې نمونوي لاسته راوړنې لري
چين په فضايي چارو کې هم مساوي مفکوره لري او په دغې برخې کې يې ښځينه ستورمزلو ته ځای ورکړی دی، چې دا د چين د ښځو چارو د پرمختګ کليدي منطق ښکاره کوي. چين د همدې منطق له مخې د اغېزمن نظام په جوړولو د ښځينه ستورمزلو لپاره عادلانه چاپېريال برابر کړی او دا د بېجينګ اعلاميې د روحيې د پلې کولو لپاره مشخصه بېلګه ده.
د ملګرو ملتونو د ښځو پر وړاندې د تبعيض د لرې کولو کمېټې رئيسې ناحيلې حیدر خبريال ته ويلي، چې چين نه يوازې د خپل هېواد د ښځو چارو د پرمختګ لپاره دغه بېلګه وړاندې کړې، بلکې د نړۍ لپاره يې هم يوه نمونه برابره کړې ده. د ناحیلې حیدر په وينا، د چين حکومت په وروستيو کلونو کې د جنسياتي برابرۍ لپاره ډېرې هڅې کړي او د قانوني چوکاټ د بشپړولو او په څو نوښتي تګلارو کې ډېرې لاسته راوړنې لري.
د ملګرو ملتونو د ۷۹ مې عمومي اسمبلې رئيس فيليمون يانګ رسنيو ته ويلي، چې روان کال د بېجينګ اعلاميې او عملياتي مرامنامې له دېرشمې کاليزې سره برابر دی او اوس د ښځو د چارو د ښه کولو د اقداماتو د بيا پيل لپاره تر ټولو ښه فرصت دی او په خبره یې، ټول هېوادونه دې د بېجينګ اعلاميې د روحیې پلې کولو ته ادامه ورکړي او د ښځو نړيوالو چارو د لا پرمختګ لپاره دې اړين ګامونه پورته کړي.
