د چين دولت رئيس شي جين پينګ د اکتوبر په ۱۴مه نېټه په بېجينګ کې د ايسلند له ولسمشرې هالا توماسدوتير سره ولیدل. هالا توماسدوتير د ښځو په نړيواله غونډه کې د ګډون لپاره چين ته راغلې ده.
شي جين پينګ په خپلو خبرو کې ويلي، چې هېواد یې له ايسلند سره اړيکو ته په درنه سترګه ګوري او غواړي له دغه هېواد سره تګ راتګ او همکارۍ نورې ژورې کړي او د دواړو هېوادونو خلکو ته لا زیاتې زیاتې ګټې ورسوي. ده ویلي چې چین او ايسلند له څواړخيزتوب څخه ملاتړ کوي، د ملګرو ملتونو په مرکزيت له نړیوال سيسټم او د نړیوال قانون پر بنسټ له نړيوال نظم څخه ملاتړ کوي. د هغه په وينا، دواړه هېوادونه بايد د نظريو تبادلې او همغږۍ زياتې کړي، د ډيالوګ له لارې د نړیوالو شخړو د حل لپاره ګډه هڅه وکړي او لا عادلانه او معقول نړيوال اداري سيستم جوړ کړي. هغه ويلي، چې دواړه خواوې بايد د ښځو د نړیوالې غونډې د تر سره کېدو په مناسبت د ښځو د نړيوالو چارو پرمختګ ته وده ورکړي.
هالا توماسدوتير ويلي، چې هېواد يې د ښځو د نړیوالو چارو د ودې لپاره د چين د مهم خدمت لوړه ستاينه کوي او هيله يې ښودلې، چې له چين سره تبادلې او همکارۍ نورې زياتې کړي، څو د ښځو د نړیوالو چارو هراړخيز پرمختګ پياوړی کړي. د هغې په خبره، ايسلند له چين سره اړیکو ته په درنه سترګه ګوري او غواړي له دغه هېواد سره همکاريز فرصتونه ، دوه اړخيزې کلتوري تبادلې زیاتې کړي او د دواړو هېوادونو ترمنځ اړيکو ته لا نور لوی پرمختګ ورکړي.
