د ”د ملګرو ملتونو د جوړېدو ۸۰مه کليزه: نړيوال نظم، نړيوال قانون او د څواړخيزم راتلونکی“ په نوم نړيوال سيمينار د اکتوبر په ۱۸مه نېټه د چين د ووهان پوهنتون او د مصر د بنها پوهنتون لخوا په ګډو ترتيباتو د چين د هوبۍ ولايت په مرکز ووهان ښار کې پرانیستل شوی دی.
د ملګرو ملتونو پخواني مرستيال سرمنشي آډولفو سواريزګونزالس، د اسيا او افريقا قانوني سلامشورتي کمېټې سرمنشې کمرين، د مصر د بنها پوهنتون مشر ناصر ګيزاوی، د ووهان پوهنتون پروفيسور ژوی سېلای په شمول زياتو ګډون کوونکو ويلي، بايد د ملګرو ملتونو د جوړېدو د ۸۰يمې کليزې په درشل کې د دوهمې نړيوالې جګړې د برياليتوب لاسته راوړنې او تر دغې نړيوالې جګړې وروسته جوړ شوی نړيوال نظم ټينګ وساتل شي، د ملګرو ملتونو د منشور او اصولو مراعات دې وشي او د قاهرې اعلاميې، پوتسدام اعلاميې او د ملګرو ملتونو د عمومي اسمبلۍ د ۲۷۵۸م پرېکړه ليک په رڼا کې دې هغه تاريخي او قانوني واقعيتونه ومنل شي چې تايوان د چين يوه برخه ده، د حاکميتونو ترمنځ د برابرۍ او د نورو په کورنيو چارو کې د نه مداخلې په شمول د نړيوالو قوانينو پر بنسټيزو اصولو دې ټينګار وشي او د ملګرو ملتونو ملاتړ دې وشي چې په نړيوالو چارو کې مرکزي رول ولوبوي او رښتينی څواړخيزم پلی کړي.
د چين د دولتي شورا د تايواني چارو دفتر مشر جاو شه تونګ او د ووهان پوهنتون د ګوندي کمېټې منشي جو کونګ جون په خپلو ويناوو کې ويلي، له خپل وطن سره د تايوان بېرته یوځای کېدل د دوهمې نړيوالې جګړې د برياليتوب او تر دغې جګړې وروسته د جوړ شوي نړيوال نظم يوه مهمه تشکيلاتي برخه ده. د يو چين پېژندنه د نړيوالو اړيکو بنسټيز اصل او د نړيوالې ټولنې اجماع ده.
د ملګرو ملتونو او د اسيا او افريقا قانوني سلامشورتي کمېټې په شمول د نړيوالو سازمانونو استازيو، د مصر، برېتانيا، امريکا، روسيې، هسپانيا، فرانسې، بېلژيک، جرمني او هالنډ په شمول د ۲۰ هېوادونو او د چين پوهنتونونو، څېړنيزو ارګانونو او اړوندو څانګو د کارپوهانو کابو ۱۵۰ تنو په ياد سيمينار کې ګډون کړی دی.
