چين د اکتوبر په ۲۰مې نېټې د روان کال د تېرو درېيو ربعو اقتصادي شمېرې خپرې کړي چې د نړيوالو رسنيو پاملرنه يې راجلب کړې ده.
نيويارک ټايمز په يوې ليکنې کې ويلي، چې د چين اقتصاد د روان کال په تېرو درېيو ربعو کې ثابت زياتوالی موندلی دی.
د امريکا د کوچ (COACH) شرکت د چيني څانګې مشرې ليليانا لوڅيوني چين ميډيا ګروپ ته ويلي، چې شرکت يې د چين پر افتصادي لرليد باور لري او موخه يې ټاکلې چې په راتلونکو ۳ تر ۵ کلونو پورې به په دغه هېواد کې خپل سوداګريز عايدات يو چند زيات کړي.
شمېرې ښيي، د سږکال په تېرو درېيو ربعو کې د چين جي ډي پي د تېر کال د همدې مودې په پرتله پنځه اعشاريه دوه سلنه زياتوالی موندلی دی، خو دغه شمېر یې د اقتصاد کومې ځانګړتياوې ښيي؟
دا د دې ښکارندويي کوي، چې د چين اقتصاد ثابت ساتل شوی.
د پيسو نړيوال صندوق څو ورځې مخکې په يوه راپور کې ويلي، چې په تېرو ۲۰۲۴ م کال کې د نړيوال اقتصاد زياتوالی درې اعشاريه درې سلنه و او په روان ۲۰۲۵م کال به دغه شمېر تر درې اعشاريه دوه سلنې هم ټيټ شي. خو د چين اقتصادي زیاتوالي په نړيوالو عمده اقتصادونو کې مخکښ ځای نيولی او نړیوال اقتصاد ته يې تر ټولو ثابت خوځنده ځواک ورکړی دی.
د روان کال په تېرو درېيو ربعو کې د چين د جي ډي پي زیاتوالی د تېر کال په پرتله صفر اعشاريه دوه سلنه زیات شوی او د تېر کال د همدې مودې په پرتله يې صفر اعشاريه څلور سلنه چټکه وده کړې ده.
د چين اقتصاد د ثبات ساتلو ترڅنګ ښه پرمختګونه هم کړي.
چين په روان کال کې د نوي کیفيت توليدي توان ته وده ورکړې او په تېرو درېیو ربعو کې یې د تجهيزاتو او ماشينونو د توليد د زیاتوالي اندازه د نورو پیاوړو صنایعو په پرتله درې اعشاريه پنځه سلنه زیاته شوې او د لوړې ټېکنالوژۍ د توليد د زياتوالي اندازه تر نورو پیاوړو صنايعو درې اعشاریه څلور سلنه زياته شوې ده.
د نړۍ د پوهنې ملکيت حق سازمان په يوه تازه راپور کې ويلي، چې په ۲۰۲۵م کال کې د چين د نوښت شاخص ډېر ښه دی او په لومړي ځل یې د نړۍ په لومړيو مخکښو لېستونو کې ځای موندلی دی.
چين د روان کال په تېرو ۳ ربعو کې يو شمېر لوی مصنوعي ځيرک ماډلونه خپاره کړي، بې چلوونکي موټرونه يې عادي کار کوي او نوښت او صنعت يېی داسې ژور پيوستون موندلی، چې پر مټ يې د دغه هېواد اقتصاد خوځنده ځواک موندلی او هم یې نړیوال نوښت چټک کړی دی.
د يادونې ده، د چين اقتصاد ډېر پياوړی بنسټ لري.
سږکال په نړۍ کې د پروټېکشنيزم څپې لوړې شوي او جيوپوليټيک کړکېچونه نور هم سخت او نړيوال سوداګريز اصطکاکونه زيات شوي دي، خو د چين اقتصاد بیا پرمختګ کړی او خپل ټينګ بنسټ يې ساتلی دی.
د روان کال په تېرو ۳ ربعو کې د چين د توکو صادراتي او وارداتي اندازه د تېر کال د همدې مودې په پرتله څلور سلنه زياته شوې او په تېرو اتو مياشتو کې يې مسلسل زياتوالی ساتلی دی.
چين نه یوازې په دوامدار ډول خپل صادارتي تولیدات پياوړي کوي، بلکې خپل سوداګریز ملګري هم زیاتوي.
چين د روان کال په لومړيو اوو مياشتو کې د ۱۶۶ هېوادونو او سیمو لپاره د درېيو لويو سوداګريزو ملګرو څخه يو دی، چې دغه شمېر د تېر کال د همدې مودې په پرتله ۱۴ زیاتوالی ښيي.
يادې شمېرې نه يوازې د چين لنډمهالی برياليتوب، بلکې اوږدمهالی تمايل یې هم ښکاره کوي.
سږ د چين د څوارلسم پنځه کلن پلان اخري کال دی او هم يې د پنځلسم پنځه کلن پلان د جوړېدو کال دی.
د چين د کمونېست ګوند د شلمې مرکزي کمېټې څلورمه عمومي غونډه د اکتوبر په ۲۰مې نېټې په پلازمېنې بېجينګ کې پرانيستل شوه، چې د دغه هېواد د راتلونکو پنځو کلونو د پرمختګ لپاره به ډيزاين او نقشه جوړه کړي.
د شنونکو په نظر، د چین پنځلسم پنځه کلن پلان د نړیوال اقتصاد لپاره ډېر مهم اهميت لري او دوی هيله ښيي، چې چين به د ثابتو پاليسيو او ورخلاصون له لارې له نړۍ سره د پرمختګ ګټې شريکې کړي.
