نړۍ ختيځ ته پام اړولی، ځکه چين د علمي ټېکنالوژۍ په نوښت خپله نوې بڼه ښودلې او د خلکو توجه يې راجلب کړې ده.
چين پدې وروستيو کلونو کې د مصنوعي ځيرکتيا، د کوانټوم مخابراتو، فضايي څېړنې او د ژور سمندر د کشف په شمول ډېرو برخو کې داسې پرمختګونه کړي، چې د اقتصاد د خوځنده ځواک تغير يې ترې ښکاري. دغه تغير چې د نوښت په محوريت يې ترسره کوي، نه يوازې خپله پرمختيايي لاره بدله کړې، بلکې نړۍ ته يې هم نوی پرمختيايي مسیر برابر کړی دی.
په چين کې ټېکنالوژۍ بېلا بېلو سکټورونو ته بدلون ورکړی دی. په کروندو کې تخمونه د ډرون په وسيله شيندل کېږي او پټي او فارمونه د لویې ډېټا د سیسټم پرمټ څارل کېږي. د چين په فاريکو کې له روبوټونو او G۵ تخنيک څخه په استفادې د محصولاتو د توليد موثريت لوړ شوی دی. په ښارونو کې د مصنوعي ځيرکتيا په وسیله ترافيک اسانه شوی او ګڼه ګوڼه پکې ډېره کمه شوې ده. پخوا چين نړيواله فابريکه بلل کېده، خو نن په يادو بدلونونو سره د نوښت نړيوال مرکز ګرځيدلی دی.
چين د يادو بدلونونو په پار ډېرې پانګونې کړې دي. دغه هېواد په ۲۰۲۴م کې د څېړنې په برخه کې ۳.۶ ټريليونه يوان لګولي، چې د ۲۰۲۰م کال په پرتله نږدې ۵۰ سلنه زياتوالی ښيي او د څېړوونکو شمېر يې په نړۍ کې لومړی ځای نيسي.
د پوهنې ملکيت حق نړيوال سازمان راپور ښيي، چې چين په لومړي ځل د نوښت د نړيوالې درجه بندۍ په لومړيو لسو ځایونو کې قرار لري. د دغه سازمان عمومي مدير ويلي، چين په نړۍ کې د نوښت مهم مخکښ هېواد ګرځېدلی دی.
د چين برياليتوبونه د دغه هېواد په ځانګړو برتريو پسې تړاو لري.
چين داسې پراخ بازار لري چې د نوښت ازموينې ته يې لوی ډګر برابر کړی دی. دغه هېواد بشپړ صنعتي ځنځير هم لري، چې تخنيکونه ترویجوي. دغه راز حکومت او بازارونه ګډې همکارۍ هڅوي او د کليدي تخنيکونو په څېړنه کې ډېرې مرستې کوي.
د چين د اقتصادي ودې لارې چارې د اصلي بدلونونو په حال کې دي. د چين اقتصاد به پخوا پر کاري ځواک او سرچينو ډېره تکيه لرله، خو اوس يې خوځنده ځواک د لوړ موثريت او نوښت له لارې رامنځته شوی دی.
شمېرې ښيي، له ۲۰۰۰م کال څخه تر ۲۰۲۱م کال پورې په چين کې د ټولو فکټورونو د توليد کچه يا ټي اېف پي په اوسط ډول هر کال ٪ ۳.۶ زیاتوالی موندلی او د مصنوعي ځېرکتيا او نورو نويو تخنيکونو پر مټ نوره هم د ډېرېدو په حال کې ده.
په چین کې په توليدي سکټور کې څرګند تغيرونه راغلي دي. په تېرو پنځو کلونو کې په دغه هېواد کې شاوخوا ۲۳۰ ځيرکې فابريکې او ۱۲۶۰ داسې عصري فابريکې چې وسايل يې پر 5G تخنيک سمبال دي، جوړې شوې دي. دغه راز په دغه هېواد کې د صنعتي روبوټونو شمېر د نړۍ تر نيمايي هم زياته برخه نیسي.
چين څه باندې یو ميليارډ او ۴۰۰ ميليونه نفوس لري چې ۴۰۰ ميليونه تنه یې منځني عايد لرونکي دي. د دې ډلې په لرلو سره په دغه هېواد کې لوی بازار رامنځته شوی او نوي تخنيکونه پکې په اسانۍ مروج کېږي. د بېلګې په توګه په کليو کې د فصلونو د لو کولو او راټولولو ځيرک ماشين په يوه دقیقه کې ۶۰۰ کيلوګرامه فصل راټولولی شي. په روغتونونو کې ډاکټران د روبوټونو په مرستې دقیق عمليات کوي. په زړکتونونو کې ځيرکو وسايلو د زړو کسانو ژوند لا خوندي او اسانه کړی او دغو لاسته راوړنو په رښتيني ډول د خلکو د ژوند کيفيت لوړ کړی دی.
لويې نوښتګرې پروژې هم د خلکو ژوند ته ښه والی راولي. ګړنديو اورګاډو د خلکو تګ راتګ اسانه کړی او د نورو صنايعو د پرمختګ سبب هم شوي دي. هغه هوايي تخنيکونه چې د سوداګريزو ګټو لپاره ترې استفاده کيږي، د کروندو مدیريت يې لادقیق کړی او ټاکل شوې، بازاري پيمانه به يې په روان کال کې ۲.۸ ټريليونو يوانو ته ورسيږي.
په تېرو څو کلونو کې د چین اقتصادي حجم په وار سره له ۱۱۰ ټريليونو یوانو، ۱۲۰ ټريليونو يوانو او ۱۳۰ ټريليونو يوانو څخه اوښتی او ښايي په ۲۰۲۵م کال کې له ۱۴۰ ټريليونو يوانو څخه هم پورته شي. د چين د اقتصادي حجم زياتوالی نه یوازې د توکو په کميت، بلکې په کيفيت، موثريت او نوښت کې هم ښکاري.
د چين پرمختيايي لار د لوېديځو هېوادونو له ماډلونو سره فرق لري. چين د بازار او حکومت دواړو رول ته اهميت ورکوي، د اقتصادي ودې د موندلو ترڅنګ، د بېوزلۍ د کمولو او د کليو د بيا سمسورتيا او نورو تدبيرونو له لارې عدالت هڅوي او دغه راز پر ورخلاصون ټينګار لري او د کمربند او لارې په وسيله له نورو هېوادونو سره ګډه وده مومي.
د چين پرمختګ دا ثابته کړې، چې هر هېواد له خپل ملي وضعيت سره سمه پرمختيايي لار پيدا کولی شي.
