ګډه شتمني په دې مانا ده، چې هر څوک په ډاډه زړه ښه او غوره ژوند وکړي او دا کوم مساوي ویش نه دی، بلکې دا د پرمختګ یوه پروسه ده، چې هرڅوک پکې برخه اخیستلی او ګټه ترې پورته کولی شي.
په ګډې سمسورتیا کې د چین د حکومتولۍ ۵۰۰۰ کلن حکمت نغښتی او د ګډې شتمنۍ مفهوم کې بیا د چیني ملت د ښه ژوند زرګونه کلن بهیر منعکس شوی دی. د چین کمونېست ګوند د چينايانو دا هیلې په تدریجي ډول په حقیقت بدلې کړې دي.
کله چې شي شي جين پينګ د چین دولت رئیس وټاکل شو، نو په ۸ کلونو کې يې نږدې ۱۰۰ میلیونه چینایان له شديدې بېوزلۍ څخه خلاص کړل او تر ۲۰۲۰م کال پورې یې په ټول هېواد کې د شدیدې بېوزلۍ رېښې غوڅې کړې.
دا تاریخي لاسته راوړنه د بشري پرمختګ په بهیر کې د بېوزلۍ د کمولو یوه نادره چاره ده او په نړیوالې حکومتولۍ کې د شتمنو او بېوزلو ترمنځ د واټن د حل لپاره یو نوی مثال دی.
رئیس شي جین پینګ بیا بیا ويلي، چې ګډه شتمني د څو کسانو لپاره نه، بلکې د ټولو لپاره ده.
په ۱۹مې پیړۍ کې امریکایي اقتصاد پوه هنري جورج ويلي وو، چې د ډېرې مادي شتمنۍ او شديدې بېوزلۍ ګډ موجوديت د کاپتاليزم نمنوي نښه ده.
د نړۍ ۱ سلنه خلک د ټولو خلکو له نیمایي ډېره شتمني لري.
رئیس شي جين پينګ بیا بیا پر دې ټينګار کړی، چې سوسياليستي چين د شتمنو او بېوزلو ترمنځ د پراخېدونکي واټن د لرې کولو لپاره کار کوي، د پرمختګ ميوه له ټولو سره شريکوي او د ټولو د ګډې شتمنۍ لپاره کار کوي.
هغه په دې باور دی چې ګډ پرمختګ د ټولنيز عدالت د ترلاسه کولو کيلي ده.
چین د بېوزلۍ د له منځه وړلو په تېرو ۸ کلنو هڅو کې د بنسټیزو تاسیساتو د ابادۍ، کارموندنې، تعلیم، طب او کور جوړولو په برخو کې څه د پاسه ۲۲۰ ميلیارډ ډالره لګولي او اوس د نړۍ تر ټولو لویه د ټولنیز ضمانت شبکه لري او ټولنیزو مساواتو ته وده ورکوي.
د چين دغه شبکه “د حکومت په مشرۍ + د بازار تنظیم + ټولنیز ګډون” د بډایه او غریب ترمنځ واټن کموي او ټولنیز ثبات او شمولیت لوړوي.
چين د اقتصادي کچې د لوړتیا پرمهال د عامه کلتوري چارو پرمختګ او عامه کلتوري خدمتي سیسټم ته وده ورکوي او د خلکو متنوع، څو اړخیزه مادي او کلتوري اړتیاوې پوره کوي.
اوس په نړۍ کې ۷۰۰ میلیونه خلک له لوږې سره مخامخ دي او ۳۰۰ میلیونه کسان بیا د اقلیمي ناورینونو له امله بې ځایه شوي دي. د بېوزلۍ له منځه وړل د یو ځانګړي هېواد داخلي چارې نه دي، بلکې دا د ټولو انسانانو پر وړاندې یوه ګډه ننګونه ده او ټول هېوادونه يې باید پر وړاندې ودرېږي.
چين په تېرو ۴۰ کلونو کې د ګډې شتمنۍ لپاره د نړیوالې حکومتولۍ د بیا جوړولو او د انسانانو د ګډ برخلیک ټولنې د ابادۍ لپاره خپل حکمت کارولی او بریالی موډل يې چمتو کړی دی.
د فرانسې د نړیوالو اړیکو څیړونکي مارک پینګټ په یوه څیړنیز راپور کې ویلي، چې چین د ټولو خلکو لپاره د ګډې سمسورتیا د پالیسۍ له لارې د عصريتوب معنی بیا ټاکلې ده.
