د چين د دولت رئيس شي جين پينګ د نومبر په لومړۍ نېټه د کوريا جمهوريت په ګيونګجو کې د اسيا او ارام سمندر سيمې د اقتصادي همکارۍ سازمان(APEC) د مشرانو د ۳۲مې غيررسمي غونډې د کوربتوب حق د سپارلو په مراسمو کې ګډون کړی او اعلان يې کړی چې هېواد به يې د راتلونکي کال په نومبر کې د کونګ دونګ ولايت په شن جن ښار کې د دې سازمان د مشرانو ۳۳مه غير رسمي غونډه تر سره کړي. هغه په دې غونډه کې ډاډ څرګند کړی چې چين غواړي له دې فرصت څخه په استفادې له اړوندو خواوو سره د اسيا او ارام سمندر سيمې د ګډې ټولنې د ابادۍ او د دې سيمې د پرمختيا او سمسورتيا د پرمخبېولو لپاره ګډې هڅې وکړي. ګډون کوونکي مشران دې ته په تمه دي چې د دې سازمان په اړه د چين له خوا جوړېدونکې غونډه په بريالۍ توګه تر سره شي. د امريکا او چين د همکارۍ صندوق اجرائيوي رئيس جون ميله واټ سي اېم جي ته ويلي چې چين د اسيا او ارام سمندر سيمې د خلکو پر ګټو تمرکز کوي او تل د ورخلاصون او همکارۍ هڅه کوي.هغه دې ته په تمه دی چې په نوي کال کې چين د ورخلاصون په پراخوالي سره د دې سيمې پرمختګ ته حياتي ځواک ور وبښي.
روان کال د ايپيک غونډه په داسې حال کې جوړېږي چې په نړۍ کې ډېر نوي بدلونونه راغلي دي. يو اړخيزم او سوداګرۍ ساتونکې کړنې سختې شوې او د تعرفو او سوداګرۍ جګړې ډېرو هېوادونو ته پراخې شوې او د يادې سيمې په پرمختګ کې د بې ثباتۍ عوامل مخ په زياتېدو دي. د دې ترڅنګ ځينو جيوپوليتيکو عواملو هم پر دې سيمې سيوری غوړولی دی نو د دې حالت پر وړاندې اړوندې خواوې د چين اواز ته سترګې په لاره دي.
څومره چې ستونزې ډېرېږي، په هماغه اندازه باید ګډې همکارۍ زیاتې کړو.
رئيس شي جين پینګ د دې غونډې په لومړي او دويم پړاو کې دوه ځله مهمې ويناوې کړې او د دې سازمان د صنعت او سودا ګرۍ په سرمشريزه کې يې کتبي ويناوې کړې دي. هغه په دې سرمشريزه کې د دې سيمې د پرانيستي اقتصاد د پرمختګ په هکله پنځه فقيره ييز وړانديز کړی، د ډيجيټلي کېدو او مصنوعي ځيرکتيا د پرمختګ لپاره د سيمې اقتصادونه يې هڅولي چې پر زرغون پرمختګ، ګډو ګټو او مشارکت ټينګار ولري او له حياتي ځواک او انعطاف پذيرې څخه ډکو سيمه ييزو همکاریو له لارې د نړۍ لپاره د ليدو وړ خدمتونه وکړي. شنونکي وايي چې د چين له خوا د ايپيک د کوربتوب حق د تر لاسه کولو پر مهال د رئیس شي ويناوې پر ورخلاصون او همکارۍ تمرکز کوي چې دا د اسيا او ارام سمندر او ان د نړۍ د پرمختګ، همکارۍ او د ننګونو د مخنيوي لپاره مهم اهميت لري.
د اسيا او ارام سمندر سيمې نفوس د نړۍ د عمومي نفوس يوه په درېیمه برخه نيسي او اقتصادي اندازه يې د نړيوال اقتصاد د عمومي اندازې په سلو کې شپېته برخه جوړوي او د نړيوالې سوداګرۍ د عمومي ارزښت نيمه برخه هم نيسي. نو دغه سيمه د نړيوال اقتصاد له حياتي ځواک څخه ډک پرمختیايي کمربند ګڼل کېږي. د سوداګرۍ ساتونکې کړنې د ډېرېدو په حال کې د اسيا او ارام سمندر اقتصادونه څنګه ستونزې لرې کړي او د همکارۍ د لا پياوړتيا لپاره ګډې هڅې وکړي؟ رئيس شي جين پینګ د اسيا او ارام سمندر د ګډې ټولنې د ابادۍ او د اقتصاد د نړيوال کېدو د پرمخبېولو له پلوه د يادو ستونزو د لرې کولو لپاره لوری روښانه کړی دی.
دا د پاملرنې خبره ده چې رئيس شي جين پینګ په دې غونډې کې څو ځلې د چين او نړیوال اقتصاد ترمنځ د نږديو اړيکو یادونه کړې ده او ويلي يې دي چې د چين پرانيستې دروازه به لا پراخه کړي، که له چين سره په يو لوري کې ګامونه پورته کړي، نو لا زیات فرصتونه به ومومي. که پر چين باور ولري، نو هغوی به پر راتلونکې باور ولري. که څوک په چين کې پانګه واچوي، نو د روښانه راتلونکې د برابرولو لپاره به پانګه واچوي. دغه ادعاوې د دې ښکارندويي کوي چې چين د پرانيستي نړيوال اقتصاد د ابادۍ لپاره ټينګ هوډ لري.
په وروستيو کې د چين د کمونېست ګوند د شلمې مرکزي کمېټې په څلورمه عمومي غونډه کې د ۱۵م پنځه کلن پلان د جوړولو وړانديز تصويب شوی او پکې ډاډ څرګند شوی چې چين به د ورخلاصون د پراخوالي له لارې ژورو اصلاحاتو ته ادامه ورکړي او باکيفيته پرمختګ به پرمخبوزي. دې بيان د دې سيمې او نړۍ لپاره نوي فرصتونه راوړي دي.
