د چین دولت رئیس شي جين پينګ د نومبر د لومړۍ نېټې په ماښام د ایپېک د مشرانو په ۳۲مه غير رسمي غونډه کې له ګډون وروسته د کوريا جمهوريت له ګيونګجو ښار څخه بېجینګ ته ستون شوی دی. دا په تېرو ۱۱ کلونو کې کوریا جمهوریت ته د نوموړي لومړی سفر و او هم يې د کوریا جمهوریت له ولسمشر لي جای میونګ سره لومړۍ رسمي لیدنه وه.
د کوریا جمهوریت اسیا ډېلي ورځپاڼې مشر یانګ کیو هیون په يوې ليکنې کې ويلي، چې رئیس شي جين پينګ د خپل سفر په ترڅ کې په اقتصادي، سوداګریزو او کلتوري برخو کې د چین او کوریا جمهوریت ترمنځ تبادلو او همکاريو ته وده ورکړې او د دواړو هېوادونو د اړیکو لپاره یې د پرمختګ نوی پړاو پيل کړی دی.
چین او کوریا جمهوریت په ۱۹۹۲م کال کې سیاسي اړیکې ټينګې کړي، چې تر دې دمه یې په مختلفو برخو کې خپلمنځي تبادلو او همکاريو ته فعاله وده ورکړې او په ۲۰۰۸م کال کې يې خپلمنځي اړیکې ستراتیژیکو همکاریزو اړیکو ته پورته کړې دي.
د کوریا جمهوریت ولسمشر لي جای میونګ د روان کال په جون کې واک ته رسیدلی او له خپل چيني سیال سره یې د ټلیفوني خبرو له لارې د دوه اړخیزو اړیکو نوی فصل پرانيستلی دی.
د چین د ټولنیزو علومو اکاډمۍ څېړونکی وانګ جیون شنګ کوریا جمهوریت ته د رئیس شي جین پینګ سفر ډېر مهم بللی او په دې اند دی، چې نوموړي د دغه سفر په ترڅ کې د دواړو هېوادونو د اړیکو د ښه والي او پرمختګ لپاره یو مهم پړاو پيل کړی دی.
د کوریا جمهوریت ولسمشر لي جای میونګ ويلي، چې هېواد یې له چین سره اړیکو ته په ډېره درنه سترګه ګوري او له دغه هېواد سره به د دوه اړخيزو دوستانه اړيکو او همکاريو د لا ښه پرمختګ لپاره ګډې هڅې وکړي.
متقابل سیاسي باور د چین او کوریا جمهوریت د اړیکو بنسټ جوړوي. دواړه هېوادونه مختلف سیاسي نظامونه لري او د توپیرونو د ساتلو ترڅنګ کولی شي ګډې ګټې وپالي.
اقتصادي او سوداګریزې همکارۍ د چین او کوریا جمهوریت د اړیکو یوه مهمه برخه ده. په ۲۰۲۴م کال کې د دواړو هېوادونو ترمنځ سوداګريز ارزښت له ۳۲۸ ميلیارډو او ۸۰ ميليونو ډالرو څخه پورته ښودل شوی دی.
چین به په راتلونکي کال کې د درېیم ځل لپاره د ایپېک کوربه وي او د کوریا جمهوریت په ګډون له بېلا بېلو خواوو سره به د اسیا او پسیفک سیمې د ازادې سوداګرۍ سیمې او د سیمه ییز اقتصادي ادغام بهیر پرمخ بوځي او د اسیا او پسیفک ګډه ټولنه به جوړه کړي.
کوریا جمهوریت د چین له خوا د ۲۰۲۶م کال د ایپيک سرمشریزې د کوربتوب ملاتړ ښودلی او ويلي يې دي، چې له دغه هېواد سره به د نړیوالو او سیمه ییزو چارو په اړه تبادلې او همغږي پياوړې کړي او سیمه ییزې او نړیوالې سولې او پرمختګ ته به وده ورکړي.
