د چين اتم نړيوال وارداتي نندارتون د نومبر په پنځمې نېټې په شانګهای ښار کې پرانیستل شوی او د همدې مياشتې تر ۱۰مې نېټې به دوام ولري.
کريسټينا انلرټ په جرمني کې د چاکلیټو سوداګري کوي او دا یې لومړی ځل دی، چې د خپل شرکت تولیدات به په ياد نندارتون کې پلور او نندارې ته وړاندې کړي.
نوموړې وايي، په داسې حال کې چې نړيوال اقتصاد له بې ثباتۍ سره مخ دی، د چين نړيوال وارداتي نندارتون د تصديو لپاره چيني بازار ته د تګ ګړندۍ لاره جوړه کړې ده.
د چين نړيوال وارداتي نندارتون (CIIE) په نړۍ کې لومړی نندارتون دی، چې د حکومت په نوښت جوړ شوی او يوازې وارداتو ته پکې بازار موندنه کېږي.
دغه نندارتون په لومړي ځل ۲۰۱۸م کال کې جوړ شو او تراوسه اوه پړاوه ترسره شوي دي. د سږني نندارتون ډېرو ګډونوالو تصديو د نندارتون په تېرو پړاوونو کې هم ګډون کړی و، چې له دې څخه د چين د لوړې سويې ورخلاصون او له نړۍ سره د پرمختيايي فرصتونو د شريکولو هوډ او صميميت ښکاري او د چین د نړيوال وارداتي نندارتون د لاسته راوړنو شمېرې هم د همدې شاهدي ورکوي.
د دغه نندارتون په تېرو اوو پړاوونو کې تر ۳۰۰۰ زیات نوي توليدات، نوي تخنيکونه او نوي خدمتونه نندارې ته وړاندې شوي، د معاملو ارزښت پکې له ۵۰۰ ميليارډو امريکايي ډالرو څخه اوښتی او د بهرنيو ګډونوالو تصديو شمېر يې له ۲۳ زرو څخه زيات شوی دی.
د نندارتون په سږني پړاو کې د تصديو نندارځي لاپراخ شوی او مساحت او د ګډونوالو تصديو شمېر يې د تاريخ نوی ريکارډ جوړ کړی دی.
دا د دې ښکارندويي کوي، چې د چين لوی بازار د نړۍ لپاره يو رښتینی ګټور فرصت دی.
د امریکا د اوریګن- چین د خويندو د اړيکو شورا (OCSSC) اجرائيه رئيس لانجين به په درېیم ځل د سیمه ييز سوداګريز پلاوي په مشرۍ په دغه نندارتون کې ګډون ولري.هغه وايي، د چين نړيوال وارداتي نندارتون نړۍ ته د ورخلاصون ډېر روښان او پرېکنده پيغام ورکوي.
د جاپان موجي (MUJI)شرکت نړيوال مدير له رسنيو سره خپلې بريالۍ تجربې شريکې کړي او ويلي يې دي: ((په چيني بازار کې زمونږ د شرکت د توکو د خرڅلاو ارزښت له مسلسلو ۱۲ مياشتو راهیسې مثبته وده موندلې او په دغه هېواد کې مو د دوکانونو شمېر ۴۲۲ ته پورته کړی دی. د چين نړيوال وارداتي نندارتون يو داسې هڅوونکی ماشين دی، چې د نړۍ د بېلا بېلو لوريو سرچينې راټولوي او په دغه هېواد کې د بهرنيو تصديو د کاروبار د ژورتيا او هم نړۍ ته د چارو د پراختيا لپاره زمينه برابروي.))
نوښت د سږني نندارتون يوه ځانګړتيا ده، ځکه په سږني پړاو کې به ۴۶۱ نوي توليدات، نوي تخنيکونه او نوي خدمتونه نندارې ته وړاندې شي.
د جرمني سیمنس (siemens) شرکت د نړيوال اجرائيوي رئيس مرستيال شياوسونګ د دغه نندارتون په تېرو ټولو پړاوونو کې ګډون کړی دی. نوموړي ويلي: ((مصنوعي ځيرکتيا دې د دغه پرانيستي او همکاريز پلاټفورم له لارې په صنعتي فعاليتونو کې وکارول شي او هيله ده، چې د چين د ډيجيټلي او ټيټ کاربن بهیر ښه وده ومومي.))
د ښاغلي شياوسونګ يادې خبرې د ډېرو بهرنيو تصديو هغه اجماع معنکسوي، چې چين نه يوازې مهم بازار دی، بلکې د نويو تخنيکونو د نوښت او کارونې نړيوال ازمايښتي ډګر هم دی.
د يادولو ده، چې سږني نندارتون د پرمختيايي هېوادونو ډېرې تصدۍ راجلب کړې دي.
په دغه نندارتون کې د کمربند او لارې د ۱۲۳ ګډونوالو هېوادونو تصدۍ ګډون لري چې دغه شمېر د تېر پړاو په پرتله ٪ ۲۳.۱ زياتوالی ښيي. دغه راز په ټولو ګډونوالو تصديو کې ۱۶۳ تصدۍ له لږ پرمختللو هېوادونو څخه دي، چې دغه شمېر د تېر پړاو په پرتله ٪ ۲۳.۵ زياتوالی ښيي. په سږني نندراتون کې د افريقايي توليداتو ځانګړی نندارځی نور هم پراخ شوی او د ګډونوالو افريقايي تصديو شمېر پکې د تېر پړاو په پرتله ٪ ۸۰ زيات شوی دی.
تنزانيايي سوداګره جولي انا مواليپ د ایوکاډو مېوو سوداګري کوي او د ختيځې افريقا په لوړه کې يې د دغې مېوې يو بڼ هم جوړ کړی دی. هغه وايي: (( دا زمونږ د شرکت لومړی ځل دی، چې د یوه بهرني هېواد په نندارتون کې ګډون کوي. سي ای ای يي نندارتون زمونږ په شان منځنيو او کوچنيو تصديو ته د نړيوال بازار د موندنې لپاره ارزښتناک فرصت برابروي. زما په اند، که د تولياتو کيفيت او د برانډ باور مو تامين شي، چيني بازار به زمونږ اوږدمهاله همکار وي. ))
د چين نړيوال وارداتي نندارتون هر کال په پوره برياليتوب ترسره کېږي او دا د لوړې سويې ورخلاصون ته د چين د ټينګ هوډ ښکارندويي کوي.
د چين د اقتصادي او ټولنیز پرمختګ په اړه د ۱۴م پنخه کلن پلان په موده کې یعنې په تېرو پنځو کلونو کې هرکال په اوسط ډول د نړيوالې اقتصادي ودې لپاره د دغه هېواد د خدماتو کچه شاوخوا ٪ ۳۰ ساتل شوې، دغه راز د دغه هېواد لخوا راجلب شوې بهرنۍ پانګې او په بهر کې د دغه هېواد پانګونه د نړۍ په مخکښو ځایونو کې قرار لري. چين په واقعي اقداماتو ثابته کړې، چې ورخلاصون د بشري تمدن مهم خوځنده ځواک او د نړۍ د سمسورتيا او پرمختيا اړينه لار ده.
