د چين اتم نړيوال وارداتي نندارتون د نومبر په ۵مې نېټې په شانګهای ښار کې پرانيستل شو، چې د همدې مياشتې تر لسمې نېټې به دوام ولري.
د سینګاپور د ملي پوهنتون د اسیا انسټیټیوټ کارپوه کشور محبوباني هم په دغه نندارتون کې ګډون کړی دی. نوموړي سي جي ټي اېڼ سره په مرکه کې ويلي، چین په نړۍ کې یوازېنی هېواد دی چې د نړیوال وارداتي نندارتون کوربتوب کوي او دا یې د نړيوال اقتصاد لپاره د دغه هېواد ګټور ګام بللی دی.
د نړۍ ډېری هېوادونه د نړیوال سوداګریز سیسټم پیاوړتیا ته ژمن دي او دغه نندارتون ورته د ګډ پرمختګ سیګنلونه ورکړي دي.
که څه هم اوسمهال نړیوال اقتصاد له ډېرو ننګونو سره مخامخ دی، خو د ښاغلي محبوباني په څېر، د ياد نندارتون ډېری ګډونوال راتلونکي ته خوشبینه دي او د چین د ورخلاصون ستاینې کوي.
د چین د اتم نړیوال وارداتي نندارتون په سږني پړاو کې د نړۍ ۱۵۵ هېوادونو او سیمو او نړیوالو سازمانونو ګډون کړی. په ګډونوالو تصديو کې يې۲۹۰ تصدۍ د نړۍ د ۵۰۰ مخکښو تصديو په ليکه کې قرار لري او يا په خپل سکتور کې ډېر پياوړي بلل کيږي. دغه راز د نندارتون پراخوالي او د ګډونوالو شرکتونو شمېر يې تاریخي ریکارډونه جوړ کړي دي.
دا د دې څرګندويي کوي، چې د چین لوی بازار ستر خوځنده ځواک لري او بېلا بېلې خواوې پکې د پرانیستو همکاريو او د متقابلو ګټو د موندلو پياوړي سیګنلونه خپروي.
د چین نړیوال وارداتي نندارتون يا سي ای ای يي (CIIE) په نړۍ کې لومړی لوی نندارتون دی، چې د دولت په کوربتوب ترسره کيږي او د وارداتو لپاره ځانګړی شوی دی.
د چین د وارداتو لومړی نړیوال نندارتون په ۲۰۱۸م کال کې په شانګهای ښار کې ترسره شو او تر دې مهال اته ځلې ترسره شوی دی.
په تېرو اتو کلونو کې په نړۍ کې ستر بدلونونه رامنځته شوي، خو دغه نندارتون په کړکېچنو حالاتو کې بهرنيو شرکتونو د پرمختګ هيلې ورکړې دي.
د چین د کمونېست ګوند د ۲۰مې مرکزي کمېټې ۴مه عمومي غونډه په دې وروستیو کې ترسره شوه او د چیني شکله عصري کېدو لپاره يې یوه نوې نقشه طرحه کړې ده.
د چين اتم نړیوال وارداتي نندارتون له يادې غونډې وروسته لومړنۍ لویه اقتصادي ډیپلوماتيکه پېښه بلل کېږي.
دغه نندارتون به نړۍ ته کوم ډاډ ورکړي؟
لومړی او تر ټولو مهم يې د ور خلاصون ډاډ دی. د ملګرو ملتونو د نړیوالې اقتصادي څارنې پخواني مشر حامد رشید رسنيو ته ويلي، چې د چین ورخلاصون د پام وړ پایلې لري او د نړۍ د لا پرانیستي اقتصادي سیسټم د جوړولو لپاره يې يوه نمونه جوړه کړې ده.
په ورته حال کې، بهرني پانګوال هم د چین پر پرمختګ باور لري او د خپل پرمختګ ډاډ یې احساس کړی دی.
د ډېرو بهرنیو شرکتونو مشرانو سي اېم جي ته ويلي، د چین پراخ بازار، د پانګونې پرانیستي او ټولشموله چاپېریال او ثابتو پالیسيو ډېرې نړيوالې تصدۍ راجلب کړې دي.
بر سېره پردې، د چین نړیوال وارداتي نندارتون نړۍ ته د ګډو ګټو د ترلاسه کولو ځانګړی ډاډ هم ورکړی دی. چین د پراخو ګټو او ټولشمولیت پر اساس د اقتصاد د نړيوال کېدو بهیر هڅولی، ترڅو ټول هېوادونه وکولی شي د پرمختګ ګټې شریکې کړي.
د چین نړیوال وارداتي نندارتون د همدې مفکورې د عملي کولو لپاره یو مهم ډګر بلل کېږي.
