د چين کمونېست ګوند د مرکزي کمېټې عمومي منشي، د دولت رئيس او د مرکزي پوځي کمېټې رئیس شي جين پينګ د نومبر له ۷مې نېټې څخه تر ۸مې نېټې پورې د ګوانګ دونګ ولايت له مې جو ښار او ګوانګ جو ښار څخه ليدنه کړې ده. شي جين پينګ د ليدنې په ترڅ کې ويلي، چې ګوانګ دونګ د اصلاحاتو او ورخلاصون په تطبيق کې مخکښه او ازمويښتي سيمه ده او د چين کمونېست ګوند د ۲۰مې مرکزي کمېټې د ۴مې عمومي غونډې د روحيې په رڼا کې دې د راتلونکو پنځو کلونو د موخو، دندو او اقداماتو په اړه علمي پلانونه جوړ کړي، د اصلاحاتو او ورخلاصون د هراړخيز ژوروالي له لارې دې د باکيفيته پرمختګ پياوړتيا ومومي، د ګوانګ دونګ – هانکانګ او مکاو لويې سيمې د ابادۍ لپاره دې نه ستومانه کېدونکې هڅې وکړي او د عصري کېدو د نويو برياليتوبونو لپاره هلې ځلې وکړي.
شي جين پينګ د نومبر د ۷مې نېټې په ماسپښين د مې جو ښار د مې شیان سیمې په یان یانګ ښارګوټي کې د يې جيان ينګ يادګاري پارک څخه ليدنه وکړه او د يې جيان ينګ مجسمې ته يې د ګلانو ګېډۍ وړاندې کړه.
شي جين پينګ په همدې ورځ د یان یانګ ښارګوټي د چكوترو کرنيزې اډې ته لاړ او هلته يې د کليوالو سيمو د سمسورتيا لپاره د ګوانګ دونګ ولايت د حکومتي ادارې کاري راپور واورېد او د چکوترو او اړوندو چمتو شويو محصولاتو او کلتوري توکو په اړه يې معلومات تر لاسه کړل. شي جين پينګ له باغوانو او کرنيز تخنيک کوونکو سره خبرې وکړې.
شي جين پينګ د نومبر د ۸مې نېټې په سهار په ګوانګ جو ښار کې د ټېکنالوژۍ او صنعت د نوښت او پیوستون د پايلو له نندارتون څخه ليدنه وکړه او ورپسې يې د ګوانګ دونګ د حکومتي او ګوندي ادارو کاري راپورونه واورېدل.
