د چين کمونېست ګوند د مرکزي کمېټې عمومي منشي شي جين پينګ د نومبر په ۷مې او ۸مې نېټې له ګوانګ دونګ ولايت څخه ليدنه کړې ده.
نوموړی په مېجو او ګوانګجو ښارونو کې پخوانيو انقلابي ځايونو او د ځانګړو کرنيزو اډو ته تللی، د تخنيکي او صنعتي نوښتونو نوې لاسته راوړنې يې له نژدې کتلي، د ګوانګ دونګ ولايت د باکيفيته پرمختګ لارښوونه يې کړې او د لوی خليج سيمې د ابادۍ لوری يې روښانه کړی دی.
د چين د اقتصادي او ټولنيز پرمختګ د ۱۵م پنځه کلن پلان موده د سوسياليستي عصريتوب د ټينګ بنسټ د ايښودلو او د پوره پرمخبېولو کليدي پړاو بلل کېږي. ګوانګ دونګ ولايت د اصلاحاتو او ورخلاصون پاليسۍ د پلې کولو د مخکښ او ازمويښتي زون په توګه د چيني شکله عصريتوب په چارو کې خورا مهم ځای لري.
عمومي منشي شي جين پينګ ګوانګ دونګ ته په خپل سفر کې د نوښتي ښيګڼو د زياتولو او د نويو پرمختګونو د موندلو کليدي دندې ته اشاره کړې او ويلي يې دي: ”مونږ بايد د اصلاحاتو او ورخلاصون او د ځانګړي اقتصادي زون روحيې لا پراخې کړو، اصلاحات او ورخلاصون ته باید پوره ژورتيا ورکړو او باید باکيفيته پرمختګ ومومو.”
د اصلاحاتو او ورخلاصون او د ځانګړي اقتصادي زون روحيه د ګوانګ دونګ ولايت تر ټولو خاصه ذهنيتي ځانګړتيا او تر ټولو قيمتي فکري خزانه بلل کېږي او هم له نورو مخکې د ګوانګ دونګ د خلکو د مخکښې ازموينې او هڅې روحيه ترې څرګندېږي.
ګوانګ دونګ ولايت په چين کې تر ټولو پياوړی اقتصادي ولايت دی چې اقتصادي حجم يې د هېواد څه دپاسه يو پر لسمه برخه نيسي. په ۲۰۲۴ کال کې د ګوانګ دونګ ولايت ناخالص کورنی توليد له ۱۴ ټريليونو يوانو څخه اوښتی و او اقتصادي حجم يې له تېرو ۳۶ کلونو راهيسې په چين کې لومړی ځای لري. دغه راز د دغه ولايت د الکترونيکي او معلوماتي توليد، موټر او الکترونيکي ماشين په شمول د ۱۵ صنعتي چارو پيمانې هم په چين کې لومړی ځای خپل کړی دی.
د پوهنې ملکیت حق نړيوال سازمان د یو لېست « د ۲۰۲۵م کال د نوښت نړيوال شاخص» له مخې، شېنجن- هانکانګ- ګوانګجو ښارونه له نورو نوښتي ښارونو مخکې دي.
د چين کمونېست ګوند د مرکزي کمېټې عمومي منشي شي جين پينګ له ګوانګ دونګ ولايت څخه د ليدنې په ترڅ کې پر دې ټينګار کړی چې د ګوانګ دونګ ولايت مختلف ډوله اقتصادونه بايد يو بل ته ښيګڼې برابرې کړي، د ګډ پرمختګ لپاره باید يو د بل نيمګړتياوو په پوره کولو کې مرستې وکړي، د نړيوالې سيالۍ وړ عصري صنعتي سيسټم باید جوړ او د نظامونو او ميکانيزمونو ورخلاصون په ثابت ډول پياوړی کړي او د هېواد دننه باید د ورخلاصون چارې ښې ترسره کړي.
عمومي منشي شي جين پينګ د نومبر په ۸مه نېټه په ګوانګجو ښار کې د ګوانګ دونګ ولايت د ګوندي کمېټې او ولايتي حکومت د کاري راپورونو د اورېدو پر مهال دې ته اشاره کړې، چې د ګوانګ دونګ، هانکانګ او مکاو د لوی خليج زون ابادي د ګوانګ دونګ ولايت لپاره خورا مهمه دنده او هم قيمتي پرمختيايي فرصت دی. د ده په خبره، ګوانګ دونګ ولايت بايد له خوځنده ځواک څخه ډک د لوی خليج زون او د نړيوالې سيالۍ وړ د ښارونو ډلې د جوړولو په موخه زياتې هڅې وکړي، سترې او مهمې پروژې باید پرمخ بوځي او اقتصاد او ټولنې ته باید پوره پرمختګ ورکړي.
