په ملګرو ملتونو کې د چین دایمي استازي فو څونګ د ډسمبر په لومړۍ نېټې د دغه نړيوال سازمان عمومي منشي انټونيو ګوټرېش ته په يو لیک کې د جاپان دلیلونه په کلکه رد کړي او د چين د حکومت دریځ يې روښانه کړی دی.
په دغه لیک کې د جاپان لومړۍ وزیرې سانای تاکایچي هغې ادعا ته چې«له ستونزو سره د تايوان مخامخ کېدل ښايي د جاپان د ژوند او مرګ بحران جوړ کړي» اشاره شوې او دا يې د چين په کورنيو چارو کې څرګنده لاسوهنه بللې ده.
فو څونګ په دغه لیک کې ليکلي، د جاپان لومړۍ وزیرې سانای تاکایچي تر دوهمې نړيوالې جګړې وروسته رامنځته شوی نړيوال نظم ننګولی او د ملګرو ملتونو له منشور او اصولو څخه يې سرغړونه کړې ده.
چين له جاپان څخه غوښتي، چې د تايوان مسئلې په اړه خپل دريځ روښانه کړي، د چين او جاپان د ګډې اعلاميې په څېر په ټولو اسنادو کې شاملې ژمنې دې مراعات کړي او د يو چين د پېژندنې اصل ته دې غاړه کېږدي.
په لیک کې په ټینګار ويل شوي، چې جاپان په وروستیو کلونو کې خپله امنیتي پالیسي تعدیل کړې او په دوامداره توګه یې خپله دفاعي بودیجه زیاته کړې ده.
فو څونګ پر نړیوالې ټولنې غږ کړی، چې د جاپان د پوځي خوځښتونو په اړه محتاط واوسي.
چین له جاپانه غوښتي چې خپلې ناسمې څرګندونې بېرته واخلي، د چین او جاپان څلورو سیاسي اسنادو ته دې درناوی ولري او د دوه اړخیزو اړیکو د سیاسي بنسټ د ساتنې لپاره دې عملي اقدام وکړي. که نه، بیا دې ټولې بدې پایلې وزغمي.
