په ملګرو ملتونو کې د چين د دايمي استازي مرستيال سون لي د ډسمبر په څلورمې نېټې له يو اړخيزو جبري اقداماتو سره د مقاومت د لومړۍ نړيوالې ورځې لمانځغونډې ته په وينا کې ويلي، چې په نړۍ کې یو اړخیزم په پراخه کچه شتون لري او پر ځينو هېوادونو يې غږ کړی چې د خلکو عادلانه اوازونه واوري او سمدلاسه او پرته له شرط او قیده يو اړخيز جبري اقدامات پای ته ورسوي. نوموړي دغه راز د ملګرو ملتونو له غړو هېوادونو او اړوندو ادارو او نورو نړيوالو سازمانونو څخه غوښتي، چې د يو اړخيزو جبري اقداماتو مخه ونيسي.
سون لي ويلي، يو اړخيز جبري اقدامات د ملګرو ملتونو له منشور او اصولو سره په ټکر کې دي، د نړيوالو قوانينو بنستيزو اصولو او نړيوال قانوني بنسټ ته زيان رسوي، د ژوند او پرمختيا د حقونو په شمول پر بنسټيزو بشري حقونو تېری کوي او د ۲۰۳۰م کال د دواملرونکي پرمختګ د انجنډا د پلي کولو مخه نيسي او هم څو اړخيزم، نړيوال نظم او نړيوال مديریتي سيستم ته زيانونه رسوي.
نوموړي پر نړيوالې ټولنې غږ کړی، چې له دې ورځې څخه په استفادې د دغو اقداماتو پر زيانونو ښه پوه شي او د رښتيني څو اړخيزم د پلي کولو او د نړيوال عدالت د ساتلو لپاره ګډې هڅې وکړي.
سون لي زياته کړې، چين به له اړوندو خواوو سره يو ځای د يو اړخيزو جبري اقداماتو او هر ډول بادارۍ پر وړاندې مقاومت وکړي، د ملګرو ملتونو په محور نړيوال سيسټم به وساتي او د لا عادلانه او معقوله نړيوال مديريت د پرمخبېولو لپاره به هلې ځلې وکړي.
