۱. ځانګړی ترتیب: د چین د دولت رئیس شي جين پينګ د دسمبر د ۵مې نېټې په سهار د سه چوان ولایت په دوجیانګ یان کې د فرانسې له ولسمشر امانویل مکرون سره دوستانه خبرې اترې وکړې.
دوجیانګ یان، چې د اوبو لګولو او د سيلاونو مخنيوي یوازینۍ لرغونې پروژه ده چې لاهم په نړۍ کې کارول کېږي. رئیس شي جین پینګ ولسمشر مکرون ته وویل، هرکله چې هغه دوجیانګ یان ته ورځي، له هغې څخه د حکومتدارۍ لپاره حکمت ترلاسه کولی شي. هغه زیاته کړه چې چین او فرانسه باید وکولی شي یو بل د نورو هېوادونو په پرتله ښه درک او درناوی یې وکړي.
ولسمشر مکرون وویل چې فرانسه او چین دواړه اوږد تاریخونه او کلتورونه لري، او د دواړو هېوادونو خلک د ښه ژوند لپاره ګډې هڅې شریکوي. د فرانسې او چین همکارۍ کولی شي ګډ پرمختګ او سوکالۍ ته وده ورکړي او د دواړو هېوادونو خلکو ته ګټه ورسوي.
۲. ځانګړي ملګري: دا چین ته د فرانسې د ولسمشر مکرون څلورم رسمي سفر دی. د ډيپلوماتيکو فعاليتونو لړۍ د روانې میاشتې د ۴مې نېټې په سهار په پلازمېنه بیجینګ کې د خلکو په لوی تالار کې ترسره شوه. دغه بوخت مهال وېش د همکارۍ د پیاوړتیا لپاره د چین او فرانسې دواړو ګډې هیلې منعکس کوي.
دا معلومه ده چې د ولسمشر مکرون پلاوي شاوخوا ۲۰۰ کسان درلودل، چې پکې د ۶ وزیرانو په شمول حکومتي غړي، د کلتوري او تعلیمي ټولنو شخصیتونه او د تصدیو مشران شامل وو.
رئیس شي جین پینګ په ۴مه نېټه له ولسمشر مکرون سره په ګډه خبري ناسته کې د همدې ورځې خبرې اترې “دوستانه، صميمي او ګټورې” وبللې. د دواړو هېوادونو مشرانو په ګډه د اټومي انرژۍ، کرنې او خوړو، تعلیم او چاپېریال په ګډون له لسو برخو څخه زیاتو همکاریزو سندونو لاسلیکونه ولیدل.
۳. ځانګړې اړیکې: سږ کال د چین او فرانسې ترمنځ د ډیپلوماټیکو اړیکو د ټینګېدو له ۶۱مې کلیزې سره برابر دی. څنګه کولی شي د چین او فرانسې اړیکې نوي پړاو ته ورسېږي؟
لومړی، متقابل باور دې لوړ شي. رئیس شي جين پينګ د۴مې نېټې د خبرو اترو په ترڅ کې وویل چې په بهرني چاپېریال کې د بدلونونو پرته، چین او فرانسه باید تل د لویو هېوادونو ستراتیژیک لید او خپلواکي وښيي او د اصلي ګټو او لویو اندېښنو وړ مسئلو کې یو بل درک او ملاتړ وکړي.
ولسمشر مکرون وویل چې فرانسه له چین سره اړیکو ته په درنه سترګه ګوري، د یو چین پېژندنې پر تګلارې ټینګار کوي او لېواله ده چې د فرانسې او چین ترمنځ هراړخیزې ستراتیژیکې همکاریزې اړیکې په دوامداره توګه ژورې کړي.
دوهم، همکاري دې تعقیب شي. فرانسه له هغو لومړنیو هېوادونو څخه وه چې د چین د اصلاحاتو او ورخلاصون په پروسه کې یې برخه واخیسته. د روان کال په لومړیو ۱۰ میاشتو کې، د دواړو هېوادونو ترمنځ د سوداګرۍ ارزښت ۶۸ اعشاریه ۷۵ میلیاردو ډالرو ته ورسېد او مجموعي دوه اړخیزه پانګونه له ۲۷ میلیاردو ډالرو څخه واوښته.
درېیم، تبادلې دې پياوړې شي. چین ته د ولسمشر مکرون د دغه سفر په بهیر کې، د دواړو هېوادونو مشرانو موافقه وکړه چې د کلتور، تعلیم او ساینس او ټېکنالوژۍ په شمول برخو کې به تبادلې او همکارۍ ژورې کړي او د پانډاګانو د ساتنې په برخه کې به د همکارۍ نوی پړاو پیل کړي.
۴. ځانګړی مسؤلیت: رئیس شي جین پینګ د روانې میاشتې په ۴مه نېټه له ولسمشر مکرون سره په خبرو اترو کې خپلې هیلې څرګندې کړې چې چین او فرانسه باید خپل مسؤلیت وښيي، د څو اړخیزیزم بیرغ دې لوړ وساتي او د تاریخ په سم اړخ کې دې په کلکه ودرېږي.
