د چين په نانجينګ کې د جاپاني یرغلګرو لخوا د وژل شويو چینایانو د يادونې مرکز د ډسمبر په ۵مه نېټه د ۲۰۲۵م کال د نويو ترلاسه شويو تاريخي ارشيفونو او سندونو د خپرولو خبري ناسته تر سره کړه.
د معلوماتو له مخې، دغه مرکز په روان ۲۰۲۵م کال کې په عمومي توګه ۵۷۳ اړوند تاريخي توکي او سندونه راټول کړي دي.
چيني الاصله امريکايي لو جاو نينګ په روان کال کې يو ځل بيا نوموړي مرکز ته يوه ډله مهم تاريخي سندونه وړاندې کړي دي. د بېلګې په توګه، د امريکا ورځپاڼې((نيوز او ناظر)) د ۱۹۳۷م کال د ډسمبر په ۱۸مه نېټه د اې پي اژانس د راپور له مخې خبر ورکړ، چې نانجينګ ته د جاپاني پوځيانو له ننوتلو وروسته په دغه ښار کې د لويې پيمانې عامه وژنه وشوه. د فرانسې ورځپانې ((ايکسيلسيور)) د ۱۹۳۷م کال د ډسمبر په ۸مه نېټه په خبر کې دا معلومات ياد کړي، چې نانجينګ ته د جاپاني یرغلګرو له ننوتلو مخکې په دغه ښار کې له ميليونونو زيات اوسېدونکي مېشت وو.
